Túrkistandaǵy «Farab» kitaphanasynda Túrkistan oblysy ákimdiginiń uiymdastyrýymen Qazaqstannyń Halyq jazýshysy, Qazaqstannyń Eńbek eri, kórnekti qalamger Muhtar Shahanovtyń 80 jyldyq mereitoiyna arnalǵan «Álem tanyǵan aqyn» atty shyǵarmashylyq keshi ótti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Kesh barysynda Muhtar Shahanovtyń ómiri men shyǵarmashylyǵyna arnalǵan «Álem tanyǵan aqyn» kitap kórmesi uiymdastyryldy. Saltanatty jiynda oblys ákimi Darhan Satybaldy aqyndy mereitoimen quttyqtap, elge sińirgen eńbegin joǵary baǵalady.
«Sizdi 80 jasqa tolǵan mereitoiyńyzben shyn júrekten quttyqtaimyn! Sizdiń adamzatty izgilikke, meiirimge, shynaiy mahabbatty baǵalaýǵa shaqyratyn óleńderińiz talai adamnyń senimin oiatty. Jigerlendirdi. Týǵan jerińiz – Qasietti Túrkistan óńirine kelip, mereitońyzdy jalǵastyrý – biz úshin úlken mártebe. Altyn ýaqytyńyzdy qiyp, elmen júzdeskenińiz úshin sizge alǵysymdy bildiremin. Jýyrda El Prezidenti Qasym-Jomart Toqaev Túrkistanǵa jumys saparynda Túrkistan qalasyna erekshe mártebe berý máselesin kóterdi. Oǵan tolyq negiz bar. Túrkistannyń rýhani astana atanýy jolynda sizdiń de úlesińiz mol dep esepteimin. Óitkeni siz parasatty jyrlaryńyzben, otanshyldyǵyńyzben el rýhyn kóterdińiz. Otyrar men Túrkistandy álemge tanytýǵa eńbek sińirdińiz», – dedi Darhan Satybaldy.
Merekelik keshte Muhtar Shahanovtyń sózine jazylǵan tańdaýly ánder shyrqaldy. Túrkistan oblysynyń tanymal ánshileri óner kórsetip, kópshiliktiń qoshemetine bólendi.
Kesh ári mereitoi iesi, Qazaqstannyń Eńbek eri, Halyq jazýshysy, aqyn Muhtar Shahanov sóz sóilep, Túrkistan jurtshylyǵyna alǵysyn bildirdi. Ultty saqtaý, memleketti qorǵaý, rýhaniiatty qoldaý baǵytynda júieli oilar aitty. Árdaiym parasat, shyndyq biiginen tabylý ár adamǵa mindet ekenin jetkizdi. Sonymen birge Sh.Qaldaiaqov atyndaǵy oblystyq filarmoniianyń ánshilerimen birge «Týǵan kún keshinde» ánin shyrqady.
Muhtar Shahanov – qazaq dalasyn óziniń qunarly jyrymen sýsyndatqan, ár qazaqtyń júregine jol taba bilgen, qaitalanbas daryn iesi. Saiasatta da el múddesi jolynda eńbek etken qairatker. Aqynnyń shyǵarmalary álemniń ondaǵan elderiniń tilderine aýdarylǵan.
