Foto: Tólebi aýdany ákiminiń apparaty
Túrkistanda Memlekettik Týdy teris ilgender tártiptik jaýapkershilikke tartyldy, dep habarlaidy QazAqparat.
Oqiǵa 15 tamyzda boldy. Túrkistan oblysy «Atameken» kásipkerler palatasynyń uiymdastyrýymen ótken «Qazaqstannyń úzdik taýary – 2023» óńirlik baiqaý-kórmesinde sahnadaǵy led-ekrannan fon retinde kórsetilgen Memlekettik Týdyń sýreti teris qarap qalǵan.
Atalǵan jaǵdai áleýmettik jelide keńinen talqylanyp, synaldy. Al is-sharaǵa jaýapty Túrkistan oblysy Kásipkerler palatasynyń basshylyǵy bul jaǵdai boiynsha jaýapty mamandarǵa shara qoldanylatynyn aityp, halyqtan keshirim surady.
«Aýqymdy is-sharada sahna tórine qoiylǵan banner eskiziniń ornalasýynda tehnikalyq qatelik oryn alǵan. Olqylyqqa jol bergen baspahana basshylyǵyna eskertý jasalyp, kásipkerler palatasynyń jaýapty qyzmetkerleri tiisti tártiptik jaýapkershilikke tartyldy. Aldaǵy ýaqytta mundai kemshilikterge jol berilmeitindigin málimdei otyra qazaqstandyqtardan, Túrkistan óńiriniń jurtshylyǵynan keshirim suraimyz» - delingen Túrkistan oblysy Kásipkerler palatasynyń baspasóz qyzmeti usynǵan aqparatta.
