Búgin Túrkistan oblystyq «Farab» kitaphanasynda memleket jáne qoǵam qairatkeri Asanbai Asqarovtyń 100 jyldyǵyna arnalǵan «Asqarovtyń aqqaiyńdary» dramasynyń premerasy ótti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Raiymbek Seitmetov atyndaǵy Túrkistan sazdy drama teatrynyń ártisteri sahnalaǵan qoiylymnyń avtory – belgili jazýshy, dramatýrg Marhabat Baiǵut.
Rýhani keshke Almaty, Shymkent qalalary men Jambyl oblysynan Asanbai Asqarovpen qyzmettes bolǵan túrli salanyń ardagerleri, qoǵam qairatkerleri, ǵalymdar, týystary, qala turǵyndary qatysty. Qoiylymnan soń oblystyq ardagerler keńesiniń tóraǵasy Jeńisbek Máýlenqulov sóz sóilep, kózine jas aldy. Sonymen qatar teatr ujymyna joǵary deńgeidegi qoiylym úshin alǵys bildirdi. Al Túrkistan oblysy mádeniet basqarmasynyń basshysy Ázimhan Qoilybaev: «Búgingi premera kópshiliktiń kóńilinen shyqty. Kez kelgen júrekten shyqqan dúnie júrekke jetetini belgili. Oǵan bizdiń ártisterdiń sheberligi dálel. Dál osy Raiymbek Seitmetov teatr ujymy jaz aiynda Rýmyniia elinde halyqaralyq teatr festivaliniń laýreaty atanǵan edi. Shyǵarmashylyq tabys tileimin, áserli qoiylymdarmen kórermendi qýanta berińizder», – dedi.
Dramada belgili memleket jáne qoǵam qairatkeri Asanbai Asqarovtyń keńestik dáýirdiń sońǵy jyldarynda totalitarlyq rejimniń qýǵyn-súrginine túsip, basynan ótkergen qiyn-qystaý taǵdyr joly sýretteledi. Osy shyǵarma arqyly kórermen sol dáýirde oryn alǵan «kóleńkeli» is-áreketterdi, Asqarovtyń qazaq eliniń bolashaǵy úshin kúresken beinesin kóre alady. Sondai-aq shyǵarmashylyq ujym «Asqarovtyń aqqaiyńdary» dramasy arqyly búgingidei beibit ómirdiń bizge ońailyqpen kelmegendigin, jas urpaq «qolda bar altynnyń qadirin» bilip, qasterleý kerektigin kórsetedi.
Aita keteiik, basty rólderdi Raýan Shyrynbekov, Talǵat Qarynbaev, Baǵlan Tólendiev, Murat Qurmanbekov, Jasulan Turǵanbaev, Kámshat Ashtekova, Jandos Mahanov, Aiaz Iliasov syndy kásibi ártister somdady. Atalmysh dramanyń rejisseri, teatrdyń kórkemdik jetekshisi – Aidar Naýryzbaev, qoiýshy sýretshisi – Qanat Sheriev, kostiým sýretshisi – Lázzat Júsipova, kompozitory – Qanat Jumabaev, teatr direktory – QR Mádeniet qairatkeri Erjan Isataev.
