Foto: QR TSM
Túrkistan qalasynda «Túrkistan – qolónershiler qalasy» halyqaralyq qolóner kórmesi ótedi. Is-shara óńirdiń mádeni-rýhani ortalyǵynda salynyp jatqan iri týristik klaster – jańa Qolóner ortalyǵynyń aýmaǵynda uiymdastyrylady, dep habarlaidy Ult.kz.
Kórme qarsańynda Týrizm jáne sport ministriniń orynbasary Erjan Erkinbaev Túrkistanǵa jumys saparymen baryp, óńirdegi týristik infraqurylymnyń negizgi nysandarynyń biri – Qolóner ortalyǵynyń qurylysymen tanysty. Jalpy aýdany 2,5 gektardy quraityn jobada 25 sáýlet nysany qarastyrylǵan. Atap aitqanda, qolóner sheberhanalary, kórme pavilondary, qonaq úiler, saýda jáne qoǵamdyq aimaqtar boi kóterýde. Joba tolyǵymen jeke investitsiia esebinen júzege asyrylyp jatyr. Jalpy quny – 5,5 milliard teńge.
«Osyndai nysandar ishki týrizmdi damytý men kreativti ekonomikany qalyptastyrýda strategiialyq mańyzǵa ie. «Túrkistan – qolónershiler qalasy» kórmesi Qolóner ortalyǵy aýmaǵynda ótetin alǵashqy iri is-shara bolmaq. Kórmeniń maqsaty – elimizdiń týristik áleýetin arttyrý, shyǵarmashylyq indýstriiany qoldaý, mádeni bolmysymyzdy nyǵaitý. Kórme týristik salany damytý jónindegi ulttyq jospar men Qazaqstannyń tarihi-mádeni murasyn saqtaý jáne damytý tujyrymdamasyn iske asyrýdaǵy mańyzdy qadam», – dedi ministrdiń orynbasary.
Oblystyq týrizm basqarmasynyń málimetinshe, kórmege Qazaqstan men shet memleketterden 140-tan astam sándik-qoldanbaly óner sheberi qatysady dep kútilýde. Kelýshiler biregei buiymdardy tamashalap, satyp alýmen shektelmei, sheberlermen júzdesip, dástúrli jáne zamanaýi qolóner tehnikasymen tanysý múmkindigine ie bolady. Sonymen qatar is-shara aiasynda áýe sharlary shoýy, AVTOFEST avtosherýi, ulttyq taǵamdar usynylatyn gastro-jármeńke, júldeler utysy, sahnalyq oiyndar jáne otandyq tanymal ártisterdiń qatysýymen kontserttik baǵdarlama uiymdastyrylady.
