Túrkistanda qazaq kúresinen eresekter arasynda Qajymuqan Muńaitpasovtyń júldesine arnalǵan «Aziia kýbogy» Halyqaralyq týrniri ótýde. Dástúrli jarysta Tájikstan, Ózbekstan, Qyrǵyzstan, Qytai memleketteri men elimizdiń barlyq óńirlerinen kelgen 300-ge jýyq sportshy baq synap jatyr.
Aziia kýbogynda saidyń tasyndai iriktelegen bilekti de júrekti balýandarǵa Túrkistan oblysy ákiminiń orynbasary Arman Sabitov sáttilik tilep, oblys ákimi Darhan Satybaldynyń quttyqtaý hatyn oqyp berdi.
«Qazaq kúresi – ulttyq sport túrleriniń ishinde ózindik orny bar erekshe sporttyń túri. Qazirgi ýaqytta álemniń 40-tan asa elinde ulttyq kúresimizden federatsiialar qurylyp, jumys atqarýda. Qazaq kúresinen Álem, Aziia, Afrika jáne Eýropa chempionattary ótkizilip, damýdyń jańa deńgeiine kóterildi. Keiingi on jyl kóleminde ótip jatqan «Qazaqstan barysy», «Eýraziia barysy» jáne «Álem barysy» dodalary da búginde kórermen kózaiymyna ainalyp otyr. Biz ulttyq sportymyzǵa qoldaý kórsetýge árqashan daiynbyz», – delingen quttyqtaý hatynda.
2 kún boiy jalǵasatyn balýandar beldesýinde 55, 60, 66, 74, 82, 90, 100, +100 keli salmaq dárejesindegi úzdikter anyqtalatyn bolady. Jarystyń bas tóreshisi Erlan Imanǵalievtiń aitýynsha, jeńimpazdarǵa qarjylai syi-sipat usynylyp, túie balýanǵa avtokóliktiń kilti tabystalmaq.
Aita keteiik, jýyrda Túrkistan qalasynda qazaq kúresinen «Turan barysy» Aziia kýbogy uiymdastyrylyp, jarys nátijesinde Qazaqstan qurama komandasy jeńimpaz atanǵan bolatyn. Jalpy Túrkistan oblysynda 4 oblystyq, 28 aýdandyq jáne qalalyq balalar men jasóspirimder sport mektebinde qazaq kúresi bólimderi bar. Onda 148 jattyqtyrýshy 3600-den asa balaǵa oqý-jattyǵý jumystaryn júrgizedi.
