Túrkistan qalasyndaǵy qazaq kúresinen eresekter arasynda Qajymuqan Muńaitpasovtyń júldesine arnalǵan Aziia kýbogy aiaqtaldy, dep habarlaidy «Ult aqparat» oblys ákimdiginiń baspasóz qyzmetine silteme jasap.
«Túie balýan» atanǵan batysqazaqstandyq Temirlan Kólbai bas júldege ie bolyp, «Niva» avtokóligin jeńip aldy.
Eki kúnge sozylǵan dúbirli dodada qazaqstandyq balýandar óz myqtylyqtaryn kórsetip, Aziia qurlyǵy boiynsha teńdessiz ekendigin kórsetti. Kezinde halqymyzdyń ataq-dańqyn kúres arqyly búkil álemge tanytqan Qajymuqan Muńaitpasov ta talai jeńistiń shyńyna jetti. Biyl keń kólemde uiymdastyrylǵan bul Aziia Kýbogynda «Túie balýan» atanǵan talantty balýan Temirlan Kólbai kópshiliktiń ystyq yqylasyna bólendi. Al Almaty oblysynyń ókili Madi Edilbaev kúmis júldeger atansa, qola júldeni Abai oblysynyń maqtanyshy Áset Ahmetjanov qanaǵat tutty. Jeńimpazdar men júldegerlerdi Túrkistan oblysynyń dene shynyqtyrý jáne sport basqarmasynyń basshysy Qanat Joldyqaraev pen kúrestiń bilikti mamany Qýat Baihodjaev, sonymen qatar qazaq kúresinen Qazaqstan Respýblikasynyń memlekettik jattyqtyrýshysy Jeńis Bitkózovter marapattap, talanttylardy tanytty. Aita óterligi, alaman kúres dodasynyń bas júldesine Ordabasy aýdanynyń ákimi Nurbek Badyraqov demeýshi bolyp, ordabasylyqtar atynan avtokólikti syiǵa tartty. Osylaisha, qazaq kúresiniń jańǵyrýyna úlesin qosty.
Qazaq kúresi assotsiatsiiasy ókilderiniń aitýynsha, Qajymuqan atyndaǵy Aziia Kýbogyn jyl saiyn dástúrli túrde uiymdastyrý josparlanyp otyr.
