Túrkistan qalasynda Hilton qonaqúiiniń alǵashqy jelisi Hampton by Hilton Turkistan qonaqúiiniń resmi ashylýy ótti, dep habarlaidy oblystyq ákimdiktiń baspasóz qyzmeti.
Halyqaralyq qonaqúidiń ashylýyna Túrkistan oblysy ákiminiń birinshi orynbasary Arman Jetpisbai, Túrkistan qalasynyń ákimi Rashid Aiýpov pen BI Group Direktorlar keńesiniń tóraǵasy Aidyn Rahymbaev qatysty.
«Bul eń aldymen strategiialyq mańyzdy salaǵa úlken úles. Týrizmdi damyta otyryp, Túrkistanǵa kelgen qonaqtar halyqaralyq deńgeidegi qyzmetti qoljetimdi baǵamen paidalana alady. Sonymen qatar, qonaqúi Túrkistannyń mádeni-rýhani ortalyǵyna úilesimdi», - dedi quttyqtaý sózinde Túrkistan oblysy ákiminiń birinshi orynbasary Arman Jetpisbai.
Qonaqúi Túrkistannyń mádeni-rýhani ortalyǵynda ornalasqan. Iasaýi kesenesi jaqyn, Uly Dala ortalyǵy men Visit Centre Turkistan mańaiynda ornalasqan. Syrtqy beti kóne ǵasyrdyń ǵimarattaryn eske túsiretin Marokko stilindegi eski qam kirpishten soǵylǵan. Orta ǵasyr men qazirgi dástúrlerdi sátti úilestire otyryp, qalanyń stilin tolyqtyra túsken. Bir jyldyń ishinde boi kótergen qonaqúidiń jalpy alańy Top Tobe jeke banket keshenin qosqanda 9000 sharshy metrdi quraidy. Standartty sanattaǵy 120 nómir bar. Múmkindigi shekteýli adamdarǵa arnaiy jasaqtalǵan bólmeler qarastyrylǵan.
Hilton – quramyna ártúrli sanattaǵy 17 qonaqúi brendi kiretin dúnie júzine áigili qonaqúiler jelisi. Álem boiynsha bul jelige 6000-ǵa jýyq qonaqúi kiredi. Hampton by Hilton Turkistan – BI Group pen Hilton Worldwide arasyndaǵy ekinshi birlesken joba. Holding Nur-Sultan qalasynda 2017 jyly Hilton Astana qonaqúiin saldy.
