Túrkistanda eki balasyn óltirdi degen kúdikpen anasy izdestirilip jatyr. Bul týraly "Ult aqparat" Stan.kz aqparat agenttigine silteme jasap habarlaidy.
7 aqpanda Túrkistan qalasynyń jaldamaly páterleriniń birinen eki jas balanyń denesi tabyldy. Keibir málimetter boiynsha olardy anasy jastyqpen tunshyqtyryp óltirgen.
Osy fakti boiynsha qylmystyq is qozǵaldy. Ólimniń sebebin anyqtaý úshin balalardyń denesi saraptamaǵa joldandy.
"Qazirgi ýaqytta bolǵan oqiǵanyń barlyq mán-jaiyn anyqtaý jáne balalardyń qaitys bolǵany men olardyń meken-jaiy týraly qurbysyna habarlaǵan ananyń, iaǵni Qyzylorda oblysy turǵynynyń ornalasqan jerin anyqtaý maqsatynda qajet jedel-tergeý sharalary júrgizilip jatyr. Istiń tergeý barysy meniń jeke baqylaýymda. Turǵyndardan jalǵan aqparat taratpaýdy suraimyn”, – deidi Túrkistan oblysynyń politsiia departamenti bastyǵy Murat Qabdenov.
Sońǵy málimetter boiynsha óz balalaryn tunshyqtyryp óltirdi degen kúdikpen izdestirilip jatqan áiel Qyzylorda oblysy Shieli aýdanyndaǵy A.S.Pýshkin atyndaǵy №46 mektep-litseide mektepke deiingi synypta tárbieshi bolyp jumys istegen.
Bolǵan jaǵdaiǵa qatysty Shieli aýdandyq bilim bólimi pikir bildirdi.
“Jaǵdai áli tolyq zerttelgen joq jáne ázirge eshqandai naqty aqparat joq. Boljam jasap, jalǵan aqparat taratpaýǵa shaqyramyz. Eger izdeýdegi kúdiktini kórseńiz dereý tiisti organdarǵa habarlasyńyz”, – delingen habarlamada.
