Túrkistan oblysynda jiyn-terim naýqany júrip jatyr. Aýyl sharýashylyǵy salasyndaǵy jumystar barysy men ózekti máseleler Túrkistan oblysynyń ákimi Ómirzaq Shókeevtiń tóraǵalyǵymen ótken aptalyq májiliste talqylandy. Óńir basshysy jiyn-terim kezeńinde jumystardy sapaly atqaryp, sharýalarǵa qoldaý kórsetýdi tapsyrdy. Bul týraly oblys ákimdiginiń baspasóz qyzmeti habarlady.
«Biyl aýyl sharýashylyǵy salasynda kórsetkish joǵary. Jetistikter jyly bolyp tur. Kóp jumys atqaryldy. Bul – osy saladaǵy azamattardyń, halyqtyń eńbeginiń jemisi. Endi osy jetistikke jetý jolyn úiretý úshin sharýalardy jinap, seminar ótkizý kerek. Kókónis, bidaiǵa qatysty seminar ótkizip, tájiribemen bólisken jón. Egistik basyna aparyp, tehnikalar men tehnologiialardy kórsetý arqyly jurtshylyqty aýyl sharýashylyǵyna qyzyqtyra alamyz», – dedi Ómirzaq Shókeev.
Túrkistan oblystyq aýyl sharýashylyǵy basqarmasynyń basshysy T.Ospanovtyń aitýynsha, biyl oblysta maqta daqyly 126,3 myń gektarǵa egilgen. Jalpy 345 myń tonna shitti maqta jinalyp, ótken jylǵy kórsetkishten artady dep josparlanyp otyr. Maqta baǵasy biyl 400 teńge kóleminde bolady dep kútilýde. 2021 jyly bir kelisiniń baǵasy 320-380 teńge aralyǵynda bolǵan.
Biyl aýyl sharýashylyǵy daqyldary 859,9 myń gektarǵa ornalastyrylyp, ótken jylmen salystyrǵanda 14,4 myń gektarǵa artyp otyr. Onyń ishinde dándi daqyldar 313 myń gektarǵa egilse, kókónis, baqsha, kartop 119,4 myń gektarǵa egilgen.
Búgingi kúnge 254 myń gektarǵa egilgen astyqty orý naýqany aiaqtaldy. Gektar túsimdiligi 19 tsentnerdi qurap, ótken jyldan 8,7 tsentnerge artyp, 471,3 myń tonna ónim jinaldy. Kókónis pen baqsha boiynsha 2,8 mln. tonna ónim jinalsa, 112,6 myń tonna jemis-jidek jinalǵan.
Oblys ákiminiń tapsyrmasymen júzege asyrylyp jatqan «Bir alqaptan jylyna 2-3 ónim alý» jobasy boiynsha biyl 8,4 myń gektarda 3000 joba iske asyryldy, birinshi, ekinshi ónimnen 230 myń tonna kókónis ónimi jinalyp, jumystar jalǵasýda. 85,5 gektarǵa jańa jylyjailar salynyp, jalpy kólemi 1552 gektardy qurady. Búgingi kúnge jylyjailar esebinen 118 myń tonna ónim óndirilgen.
Jalpy biyl memleket tarapynan kúzgi jiyn - terim jumystaryna 48 myń tonna janar-jaǵar mai bólinip, agroqurylymdarǵa litri 200-202 teńgeden berilip jatyr. Bul — naryqtyq baǵadan 15-20% tómen. 522 túrli mineraldy tyńaitqyshtardyń qunyn 50%-yn sýbsidiialaýǵa biýdjetten qarjy bólindi.
