Túrkistanda «AMANAT» partiiasynyń Saiasi menedjment akademiiasy jáne partiianyń Túrkistan oblystyq filialynyń uiymdastyrýymen «Áielderdiń el damýyndaǵy róli» atty forým ótti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Qoǵamdaǵy áielderdiń rólin talqylaý jáne júielik máselelerdi sheshýdiń jalpy tásilderin ázirleý maqsatynda uiymdastyrylǵan forýmǵa aýyldyq jerde turatyn áielder, úi sharýasyndaǵy analar, ózin-ózi jumyspen qamtyǵandar, jumyssyzdar, kópbalaly analar, biýdjettik sala qyzmetkerleri men kásipkerler, depýatttar, qoǵam qairatkerleri qatysty. Sondai-aq Almaty, Qostanai, Astana, Shymkent qalalarynan arnaiy qonaqtar keldi.
Forýmdy ashqan «AMANAT» partiiasy Túrkistan oblystyq filialy atqarýshy hatshysynyń orynbasary Qalyima Jantóreqyzy forýmnyń jumysyna sáttilik tiledi.
«Áiel – tirshilikiń tutqasy, ainasy. Kez kelgen qoǵamda áiel-ananyń orny erekshe, olarǵa degen yqylas ta, niet te ózgeshe. Búgingi ótkizilip jatqan forým áielderdiń el damýyndaǵy rólin aiyqyndaityn biregei is-shara. «AMANAT» partiiasy ár qashanda názik jandy azamatshalardy qoldap kelgen. Qazirgi tańda oblystyń saiasi-qoǵamdyq ómirine de aralasyp júrgen azamatshalarymyzda az emes. Túrkistan oblysynda 1 mln. 28 myń 323 áiel azamaty bar, bul oblys halqynyń jalpy 49,3 paiyzyn quraidy. Respýblikadaǵy árbir besinshi bala Túrkistan oblysynda dúniege keletini barshańyzǵa málim. Túrkistan oblysyndaǵy 320 depýtattyń 75-i áielder bolsa, oblystyq máslihattaǵy 45 depýtattyń 9-y – áielder. Bul eshqashan bolmaǵan jetistik», – dedi Qalyima Jantóreqyzy.
Basqosýda «ORDA FM» radiosynyń direktory Meiramgúl Mádáli is-sharanyń mańyzdylyǵyna toqtalyp, áielderdiń el damýynda alatyn orny joǵary ekendigin jetkizdi. «Uly dala» aýyl biznesin damytý qaýymdastyǵynyń ókili Jandos Ázimbai forýmǵa moderatorlyq jasady.
Áleýmettik-demografiialyq progressti qamtamasyz etýdegi áielderdiń jańasha róli talqylandy. Ekonomikalyq ósýdiń jańa úlgilerine kóshýge, densaýlyq saqtaý men bilim berýdi damytýǵa, áielder arasynda qarjylyq saýattylyq problemalaryn sheshýge jáne ózin-ózi baǵalaýdy, jeke ózin-ózi damytýdy arttyrýǵa arnalǵan baiandamalar jasaldy. Taqyryp aiasynda túrli beinerolikter kópshilik nazaryna usynyldy. Onda ár salada tabysty eńbek etip jatqan áielderdiń ómiri kórsetildi. Al plenarlyq otyrysta «Áielder: jańa jaǵdaidaǵy jahandyq missiia» taqyryby talqylandy.
Jetisai aýdanynyń isker áielder qoǵamdyq birlestiginiń tóraiymy Nabatkúl Baitanaeva «Aýyldyq aýmaqtardyń damý úrdisteri. Áielderge arnalǵan infraqurylym jáne jaǵdailar» jóninde, al «Qostanai qalasynyń №3 emhanasy» KMK ginekologiia meńgerýshisi Gýlnara Kojagildina «Áielder missiiasy: birge salaýatty búginimiz ben bolashaǵymyz úshin» taqyrybyn sóz etti. Oblystyq isker áielder qaýymdastyǵynyń tóraǵasy Inara Namazbaeva kásipkerlik salasymen ainalysýdyń qyr-syrymen túsindirdi.
Basqarmanyń jetekshi mamany Madina Sapahova «Qarjylyq saýattylyq – otbasy biýdjetin josparlaýdyń negizi» taqyrybynda baiandama jasady. «Senim júrek» múgedekter qoǵamy» qoǵamdyq birlestik tóraǵasynyń orynbasary Gúlbahira Tájibaeva «Áielder kóshbasshylyǵyn ilgeriletý» aiasynda óz tájiribesimen bólisti. Forým qoǵamdaǵy ózekti máseleler boiynsha suraq-jaýappen ulasyp, usynys-tilekter nazarǵa alyndy.
