Búgin «Nur Otan» partiiasynyń praimeriz ótkizý kestesine sáikes, Túrkistan oblysynyń aýdan-qalalarynda jariia pikirsaiys bastaldy. Bul jóninde partiianyń baspasóz qyzmeti habarlady.
Túrkistan qalasyndaǵy debat Qoja Ahmet Iasaýi kesenesi mańyndaǵy amfiteatrda ótti. Erekshe orynda uiymdastyrylǵan pikirsaiysqa 6 úmitker qatysyp, óz biliktiligi men sózge sheshendikterin kórsetti. Kezinde talai biler keńesi ótkizilgen Túrkistan tórinde pikirsaiystar da joǵary deńgeide ótkizildi.
Osy saiasi dodaǵa arnaiy kelgen «Nur Otan» partiiasy Túrkistan oblystyq filialy tóraǵasynyń orynbasary Beisen Tájibaev quttyqtaý sóz sóilep, qatysýshylarǵa sáttilik tiledi.
«Bir dáýirlerde ashyq aspan astyndaǵy amfiteatrlar kúsh saiysy ótetin oryndar bolsa, qazir kóne shaharda bul oryn oi saiystyratyn ortalyqqa ainaldy. Respýblika boiynsha praimerizge úmitkerlerdiń 1144-i Túrkistan oblysynan qatysyp otyr. Sonyń ishinde Túrkistan qalasynan 106 úmitker baq synaýǵa bel bailapty. Mundai debattardan tartynbaý kerek. Oi túkpirindegi josparlaryńyzdy, baǵdarlamalaryńyzdy ashyq aityp, jurtshylyqqa tanystyrǵan jón. Sizderdi ashyq básekede pikirsaiys talaby men erejesin saqtai otyryp, joǵary deńgeide pikir talastyrady dep senemin. Elbasynyń bastamasyn qoldap, Túrkistandy damytý baǵytynda eńbek sińiredi dep esepteimin. Qasietti Túrkistan tórinde saiasi qadamdy bastap, adaldyq pen adamdyqty tý etip shyǵatyndaryńyzǵa senimdimin. Barshańyzǵa sáttilik tileimin», – dedi Beisen Dáýletuly.
Daladaǵy erkin formattaǵy debat qatysýshylarǵa erekshe shabyt syilady. Olar kókeide júrgen oilaryn aityp, bir-biriniń sailaýaldy baǵdarlamalary boiynsha suraqtaryn qoidy.
«Ýáde berý – ońai. Ony oryndaý bar. Keleshekte depýtat bolǵan tulǵalar da osy amfiteatrda, el aldynda esep berse», – deidi praimerizge qatysýshylar.
Jalpy Túrkistan oblysynda 30 qyrkúiekke deiin 200-dei pikirsaiys uiymdastyrylyp, oǵan 1100-den astam kandidat qatysýy kerek. Búginde 16 aýdan-qalada jariia pikirsaiystar ótip jatyr.
.jpeg)