«Aiqyn» gazetiniń bas redaktory, «Bolashaq» prezident baǵdarlamasynyń túlegi Nurmuhamed Baiǵaraev TMYK-tyń beiresmi samitine qatysty pikir bildirdi, dep habarlaidy QazAqparat.
Sarapshy Qazaqstan úshin Túrki integratsiiasyn ózge de integratsiialyq jobalarmen qatar alyp júrý mańyzdy ekenin aitady.
«Meniń oiymsha, keshegi beiresmi sammittiń ótýiniń ózi mańyzdy. Qazaqstanǵa Túrki integratsiiasy óte qajet dep oilaimyn. Sebebi, Eýraziialyq Ekonomikalyq Odaq boiynsha bir baǵytqa ǵana táýeldi bolyp qalmaý úshin oǵan balans retinde, tepe-teńdikti saqtaý úshin túrki baǵytyndaǵy integratsiiany da qatar alyp júrgenimiz kerek. Ekonomikalyq múddeler bolǵanymen, kóp jaǵdaida kez kelgen memlekettiń túpki bolmysyna, tegine qarai tartylatyny jasyryn emes», - deidi «Aiqyn» gazetiniń bas redaktory.
Ol, sondai-aq, Qazaqstan tarapynyń Túrkistanda arnaiy ekonomikalyq aimaq qurý týraly usynysy aradaǵy yntymaqty jańa deńgeige shyǵaratyn tetik bolady dep otyr.
«Keshegi sammitke Qazaqstan bastamashy bolǵandyqtan, Prezident Qasym-Jomart Toqaevtyń Túrkistanda arnaiy ekonomikalyq odaq qurý týraly usynysy da, Iassaýi atyndaǵy stipendiǵa 50 grant bólý bastamasy oryndy dep oilaimyn. Kez kelgen integratsiia ekonomikalyq baǵytty da qamtýy kerek. Árine, birinshi kezeńde institýttsiialaný júredi. Ókildikter ashylyp, bilim mádeniet salasynda bailanys jandanǵannan keiin ekonomikalyq aimaqtyń jumysy qyzady dep topshylap otyrmyn. Sonyń aiasynda arnaiy kompaniialar qurylyp, túrki elderiniń yntymaǵy ekonomikalyq deńgeige shyǵady. Sol kezde ǵana memleketter arasynda shynaiy saýda, shynaiy integratsiia bastalýy múmkin. Osy turǵydan alǵanda Túrkistanda arnaiy ekonomikalyq aimaq qurý óte qajet joba», - dedi saiasattanýshy.
Nurmuhamed Baiǵaraev aradaǵy bailanysty nyǵaitý úshin týystas elderdiń árqaisysyna 50 granttan bólsek te, kóptik etpeidi dep esepteidi.
«50 grant bastamasy boiynsha aitsaq, Qazaqstannyń múmkindigi osy uiymdaǵy árbir memleketke 50 granttan berýge jetedi. Sebebi, kezinde Qazaqstan Aýǵanstan stýdentterine 1000 grant bergen kezder bolǵan. 10 jyl buryn sondai múmkindik bolǵan. Qazir de sondai múmkindik bar. Túrkiia Prezidentiniń Túrki keńesin uiym deńgeiine shyǵarý qajet degeni de jaqsy usynys. Óitkeni uiymnyń aty – uiym. Uiym bolǵandyqtan, ol halyqaralyq qatynastardyń quqyq nysanyna ainalady. Onymen ózgeler de sanasatyn bolady. Sonymen birge, mádeni, gýmanitarlyq bailanystardy ǵana emes, saiasi, ekonomikalyq, áskeri qarym-qatynastardy jandandyrýǵa bolady», - degen sarapshy integratsiia aiasynda keibir memleketterdiń jeke problemalaryn búkil túrki álemine tańýdan aýlaq bolý kerektigin atap ótti.
«Túrkiia tarapy osy integratsiia aiasynda óziniń Kiprdegi máselelerin kóterip jatyr. Ondai máselelerden saq bolý kerek. Sondai-aq, Qarabaq máselesi de kóterildi. Iá, ol Ázerbaijannyń jeńisi. Biraq oǵan da tym saiasi mán ústeýdiń qajet joq dep oilaimyn. Óitkeni ol eki eldiń arasyndaǵy másele. Qazaqstannyń Eýraziialyq ekonomikalyq odaq aiasynda óziniń ustanatyn baǵyttary bar. Bul jerde Qazaqstannyń burynnyn kele jatqan kópvektorly saiasaty bar. Sony da eskergen jón dep oilaimyn», - dep túiindedi sarapshy.
