QR Mádeniet jáne sport ministrliginiń uiymdastyrýymen, «AMANAT» partiiasynyń qoldaýymen «Altyn dombyra» respýblikalyq aqyndar aitysynyń jeńimpazy anyqtaldy.
Túrkistan tórinde ótken alaman aitysta ádil qazylar sheshimimen Túrkistan óńiriniń týmasy Erkebulan Qainazarov «Altyn dombyranyń» iegeri atandy. Jeńimpazǵa «Altyn dombyra» men 3 mln. teńge tapsyryldy. Aty ańyzǵa ainalǵan óner qairatkeri Asanáli Áshimov pen QR mádeniet jáne sport vitse-ministri Nurǵisa Dáýeshov «Altyn dombyrany» Erkebulan Qainazarovqa saltanatty túrde tapsyrdy. Qazylar alqasynyń músheleri júzden júirik, myńnan tulpar shyqqan jeńimpazdardy marapattady.
Tanymal aqyn Rústem Qaiyrtaiuly (Almaty) júldeli I oryndy (2 mln.teńge), Birjan Baitýov pen Shuǵaiyp Sezimhan II oryndy (1 mln.) , Talǵat Myqi (BQO) men Haziret Berdihan (Almaty) jáne Móldir Aitbai (Qyzylorda) III oryndy (750 myń) ielendi. Altyn dombyranyń 500 myń teńgelik arnaiy júldesi Nurlan Esenqulovqa (Túrkistan), Arǵynbek Qalbaevqa (Mańǵystaý) jáne Qalijan Bildáshevke (Shymkent) buiyrdy. Ózge de qatysýshy aitysker aqyndarǵa 300 myń teńge tabystaldy. Aitys aqyndary men jyrshy-termeshilerdiń halyqaralyq odaǵynyń tóraǵasy Júrsin Ermannyń sheshimimen Birjan Baitýov pen Rústem Qaiyrtaiuly «Aitystyń aqtańgeri» atandy.
Dodanyń qorytyndy keshinde Nurǵisa Muratuly birqatar aqyndarǵa, atap aitqanda Shalqarbai Izbasarovqa, Haziret Berdihanǵa, Shynbergen Súleimenovke, Qalijan Bildáshovke, Turar Tileýlievke, «QR Mádeniet salasynyń úzdigi» tósbelgisin tabystady.
«Biyl 11-shi ret ótip jatqan «Altyn dombyra» aitysy qasietti Túrkistanda ótip jatyr. Onyń sebebi «Altyn dombyra» aitysynyń zańdylyǵyna sáikes, qai oblystyń nemese qalanyń aqyny jeńimpaz bolsa, kelesi jyly sol óńirde ótý bekitilgen. Byltyr Túrkistan oblysynyń belgili aqyny Bekarys Shoibekov ielenýine bailanysty «Altyn dombyrany» shahardaǵy «Uly Dala Eli» ortalyǵynda bir jyl boiy kórermender tamashalai aldy», – dedi vitse-ministr Nurǵisa Muratuly.
Al óner maitalmany Asanáli Áshimov óz sózinde «Túrkistan – er túriktiń besigi» dep Maǵjan Jumabaev jyrlaǵan uly, tarihi qalada «Altyn dombyrany» ótkizeiik degen sheshim qabyldandy. Onysy durys. Ataǵy men abyroiy bar aqyndardyń jaqsylary kelip, halyqqa osynda óner kórsetti. Biyl Erkebulan bas júldege ie boldy. Qutty bolsyn. Túrkistan halqynyń ál-aýqaty túzelip, mádenieti kóterilsin dep tileimin. El aman bolsyn!» dep tilegin bildirdi.
Erkebulan Qainazarov usynysymen biyl da «Altyn dombyra» Túrkistan qalasynda qalady. Aitys súier qaýym aldaǵy ýaqytta «Uly dala eli» ortalyǵy ekspozitsiiasynan tamashalai alady.
«Altyn dombyrada» tek jeńimpaz bolý emes, abyroimen óner kórsetýden artyǵy joq. Sondyqtan birneshe jyl boiy osy aitysqa qatysyp kelemiz. Týǵan jerge kelgende buiyrǵanyna qýanyshtymyn. Kórermenderge, jankúierlerge, túrkistan jurtyna, jalpy barshaǵa alǵysym sheksiz», – dedi jeńimpaz.
Biylǵy aitys ult ustazy Ahmet Baitursynulynyń 150 jyldyǵyna arnalyp otyr. Jyr dodasyna elimizdiń ár óńirinde jyl boiy ótken aitystarda jeńimpazy atanǵan 18 tanymal aqyn baq synady. Eki kúnge josparlanǵan alaman aitysta aitylǵan shýmaqtar halyqtyń kóńilinen shyqty.
Aitystyń ashylý saltanatynda «AMANAT» partiiasynyń tóraǵasy, QR Parlamenti Májilisiniń tóraǵasy Erlan Qoshanov, Túrkistan oblysynyń ákimi Darhan Satybaldy arnaiy qatysyp, úzdik aqyndarǵa sáttilik tiledi. Aitysty Qazaqstannyń eńbek sińirgen qairatkeri, QR Parlamenti Májilisiniń depýtaty Amanjol Áltaev júrgizip, aitys súier qaýymnyń Júrsinin joqtatpady.
Alǵashqy kúni 9 jup óner kórsetip, ádil qazylardyń baǵasyna ie boldy. Aitystyń ekinshi kúninde jartylai finalǵa ótken 10 aqyn kórermenge naǵyz aitystyń úlgisin kórsete bildi. Tartysty dodanyń aqtyq finalyna Birjan Baitýov pen Rústem Qaiyrtaiuly jáne Erkebulan Qainazarov pen Shuǵaiyp Sezimhan joldama aldy.
Aitýly sharaǵa kórnekti óner qairatkeri, Qazaqstan jáne KSRO Halyq artisi, «Otan», «Qurmet», «Qazaqstannyń Eńbek Eri» ordenderiniń iegeri Asanáli Áshimov (tóraǵa), aqyn, Qazaqstannyń eńbek sińirgen qairatkeri, Halyqaralyq «Alash» ádebi syilyǵynyń iegeri Ǵalym Jailybai, QR Prezidentiniń ádebiet salasyndaǵy prezidenttik stipendiiasynyń iegeri, Eren eńbegi úshin medaliniń iegeri, «Qurmet» ordeniniń iegeri Nurjan Svetqali, aqyn, QR Parlamenti Májilisiniń depýtaty Janarbek Áshimjan, aqyn, Halyqaralyq «Alash» syilyǵynyń laýreaty, Qazaqstannyń eńbek sińirgen qairatkeri Dáýletkerei Kápuly, aqyn, Qadyr Myrza Áli atyndaǵy «Mádeniet jáne óner» ortalyǵynyń direktory Baýyrjan Qaliolla, aitysker akyn, QR Mádeniet qairatkeri, Memlekettik «Daryn» syilyǵynyń iegeri Bekarys Shoibekov tórelik etti.
Aita keteiik, jyr dodasynyń negizgi maqsaty qazaq aitys ónerin, sonyń aiasynda óńir mýzeilerin, sonymen qatar salt-dástúrlerdi keńinen nasihattaý bolyp sanalady. Respýblikalyq «Altyn dombyra» aqyndar aitysy 2012 jyldan bastap uiymdastyrylyp keledi.
