Túrkistanda túrki álemi ádebi jýrnaldary redaktorlarynyń VIII kongresi bastaldy. Ońtústik Qazaqstan oblysy ákimdiginiń uiymdastyrýymen jáne TÚRKSOI halyqaralyq uiymy men Eýraziia Jazýshylar odaǵynyń qoldaýymen ótip jatqan basqosýǵa 19 elden 30-ge jýyq redaktorlar men jazýshylar, kórnekti mádeniet qairatkerleri qatysýda, dep habarlaidy Ult.kz tilshisi QazAqparat agenttigine silteme jasap.
Elbasy Nursultan Nazarbaevtyń «Bolashaqqa baǵdar: rýhani jańǵyrý» atty maqalasynyń aiasynda uiymdastyrylyp jatqan kongress Q.A.Iasaýi atyndaǵy HQTÝ Mádeniet ortalyǵynda ótýde. Sharanyń maqsaty - túrki halyqtarynyń ádebi bailanystaryn damytý arqyly ulttyq tilderdegi qazirgi zamanǵy aqparat almasýyn jetildirý, ádebiet salasyndaǵy úzdik týyndylardy, ozyq qalamgerlerdi anyqtaý bolyp otyr.
«Túrkistan - túrki mádenietiniń astanasy» mádeni jobasynyń aiasynda ótkiziletin kongress jumysyna Ońtústik Qazaqstan oblysy ákiminiń orynbasary Ulasbek Sádibekov, TÚRKSOI halyqaralyq uiymynyń Bas hatshysynyń orynbasary Fyrat Pýrtash, Eýraziia Jazýshylar Odaǵynyń tóraǵasy Iakýb Omerogly, Qazaqstan Jazýshylar odaǵynyń hatshysy, «Juldyz» jýrnalynyń bas redaktory, Memlekettik syilyqtyń iegeri, aqyn Ulyqbek Esdáýlet jáne t.b. ádebiet jáne mádeniet qairatkerleri qatysyp, sóz sóileýde.
Eki kúnge sozylatyn shara baǵdarlamasy boiynsha «2016 jylǵy Túrki álemindegi jyl ádebietshisi» syilyǵyn tapsyrý rásimi ótkizilip, 2017 jyldyń úzdik ádebietshisi anyqtalatyn bolady. Túrki álemi ádebi jýrnaldary redaktorlarynyń VIII kongresinde túrki tildes halyqtardyń búgingi ádebi ómirindegi ádebi jýrnaldardyń qyzmeti sarapqa salynyp, «Túrki álemi ádebietindegi zamanaýi shyǵarmashylyq úrdis jáne ádebi jýrnaldar» taqyrybynda seminar ótkiziledi dep kútilýde.
