Túrkistan qalasy men oblysynyń birneshe aýdanynda kámeletke tolmaǵandarǵa qatysty jynystyq zorlyq jasady degen kúdikpen er adamdar ustalyp, qamaýǵa alynǵan. Bul týraly áleýmettik jelide advokat Lázzat Raqysheva jazdy, dep habarlaidy ult.kz.
Onyń málimetinshe, Túrkistan qalasynda 61 jastaǵy er adam 6 jastaǵy qyzdy zorlady degen kúdikke ilinip, qamaýǵa alynǵan. Saýran aýdanynda 53 jastaǵy azamat 7 jasar qyzǵa qatysty osyndai qylmys jasady degen kúdikpen ustalǵan.
Al Shardara aýdanynda 31 jastaǵy er adam 16 jastaǵy jasóspirimge qatysty zorlyq áreketin jasady degen kúdikke ilingen.
Advokat bul oqiǵalarǵa bailanysty balalardyń keiingi taǵdyryna alańdaýshylyq bildirdi. Onyń aitýynsha, buǵan deiin Túrkistan oblysynda jynystyq zorlyqtan zardap shekken eki balanyń ata-anasy kúdiktilerden aqsha alyp, qylmystyq isti jeńilirek bapqa qaita saralaýǵa kelisken jaǵdailar bolǵan.
Raqyshevanyń sózinshe, bir otbasyna 5 million teńge, ekinshisine 2 million teńge kóleminde aqsha usynylǵan. Ata-analar kúdiktilerdi keshirgen. Advokat bul derekterdi óziniń burynǵy quqyq qorǵaý tájiribesi aiasynda aityp, mundai jaǵdailardyń bala quqyǵyna keri áser etýi múmkin ekenin kóterdi.
«Eń bastysy – bul balalardyń keiingi jaǵdaiy ne boldy? Olarǵa psiholog kómegi kórsetildi me? Aqsha balanyń densaýlyǵy men ońalýyna jumsaldy ma?» degen másele kóterdi ol.
Lázzat Raqysheva sondai-aq osyndai isterde ata-analardyń qabyldaityn sheshimi balanyń múddesine qaishy kelmeýi keregin atap ótti. Onyń pikirinshe, jynystyq zorlyqtan zardap shekken balalarǵa tek tergeý kezinde emes, odan keiin de uzaq ýaqyt boiy psihologiialyq kómek qajet.
