Foto: ashyq derekkóz
Túrkistan oblysynda jerasty tonneli arqyly janarmai ónimderin shekaradan zańsyz ótkizýmen ainalysqan halyqaralyq qylmystyq toptyń áreketi áshkerelendi, dep habarlaidy Ult.kz.
Arnaiy operatsiia Túrkistan oblysy prokýratýrasynyń úilestirýimen, Qarjylyq monitoring agenttigi men Ulttyq qaýipsizdik komitetiniń oblystyq departamentteri jáne Ózbekstan quqyq qorǵaý organdarynyń qoldaýymen júrgizildi.
Tergeý kezinde top músheleri Qazaqstan men Ózbekstan shekarasyna jaqyn mańda uzyndyǵy 450 metr bolatyn jerasty tonnelin qazǵany anyqtaldy. Zańsyz shema eki ai boiy jumys istegen. Osy ýaqyt ishinde shetelden qarjylandyrylǵan janar-jaǵarmai materialdaryn tasymaldaýǵa arnalǵan jasyryn logistikalyq arna qurylǵan.
Operatsiia kezinde Ózbekstan tarapy da óz aýmaǵynda qylmystyq áreketke qarsy sharalar qabyldap, sinhrondy jumystar atqardy.
Nátijesinde, qylmysqa qatysy bar barlyq tulǵalar anyqtalyp, Qazaqstannyń 5 azamaty kúdikti retinde tanyldy. Qazirgi tańda tergeý aiaqtalyp, qylmystyq is sotqa joldandy.
