Foto: Smartnews.kz
Túrkistanda 15 jasar mektep oqýshysy aýyr soqqy saldarynan kóz jumdy. Áleýmettik jelilerde oqiǵaǵa jasóspirimderdiń qatysy bolýy múmkin degen aqparat tarady. Politsiia qylmystyq is qozǵady, dep habarlaidy Ult.kz SMARTNEWS.KZ-ke silteme jasap.
Telegram-arnalarda oqiǵa bylai sipattalǵan: jasóspirim zirat mańyna shaqyrylyp, birneshe ret soqqyǵa jyǵylǵan. Zardap shekkenniń aǵasynyń aitýynsha, tórt adam kezekpen uryp, júrek tusyna segiz ret soqqy jasaǵan.
«Júregi toqtap qalǵan. Uiqy bezi de zaqymdanǵan. Ol sol jerde qaitys boldy», – dedi týysy.
Marqumnyń otbasy balanyń ákesiz óskenin, fizikaǵa qyzyqqanyn jáne bolashaqta UQK qyzmetkeri bolýdy armandaǵanyn aitty.
Túrkistan oblystyq politsiia departamentiniń málimetinshe, qaiǵyly jaǵdai 3 qarashada mektep aýmaǵynda bolǵan. Aldyn ala aqparatqa sáikes, 9-synyp oqýshysy qurdasyn keýde tusynan urǵan, nátijesinde jasóspirim oqiǵa ornynda jan tapsyrǵan. Kúdikti jáne oqiǵa kezinde janynda bolǵandar anyqtalyp, ustaldy. Tergeý erekshe baqylaýǵa alyndy.
Sonymen qatar, kámeletke tolmaǵandardyń zańdy ókilderine balalardy tárbieleý jónindegi mindetterin oryndamaǵany úshin ákimshilik shara qoldanyldy. Aýdan ákimdigi janyndaǵy kámeletke tolmaǵandardyń quqyqtaryn qorǵaý komissiiasyna tiisti usynys engizildi.
Iývenaldy politsiia mundai jaǵdailardyń aldyn alý maqsatynda túsindirý jáne profilaktikalyq jumystardy jalǵastyrýda.
