Foto: Gov.kz
Jetisai aýdanynyń maqta daqylyn óndirýshi sharýalarynyń máselesin ońtaily sheshý maqsatynda óńirdiń maqta óńdeý zaýyttary men aýdannyń iri sharýa qojalyq tóraǵalarymen kezdesý ótkizdi, dep habarlaidy «Ult aqparat».
Oblystyq ákimdiktiń baspasóz qyzmetiniń málimetinshe, ashyq áńgime barysynda maqta sharýshylyǵy salasyndaǵy ózekti máseleler talqylanyp, aýdan basshysy tarapynan tiisti usynystar engizildi. Diqandardyń ýájin jetkizgen Serik Úsenuly zaýyt basshylaryna birqatar talaptar qoidy.
– Cizdermen aýdanymyzdyń sharýalary úshin mańyzdy máselelerdi talqylap, ortaq mámilege kelý úshin arnaiy kezdesip otyrmyz. Aýyldyq okrýgterde ótken kezdesýlerde sharýalardyń aitatyn birinshi máselesi – aýyl sharýashylyǵynda óndirilgen ónimderdiń, sonyń ishinde maqtanyń baǵasy. Sharýalardyń erte kóktemnen qara kúzge deiingi eńbegi zaia ketpesin. Múmkindiginshe durys baǵa shyǵaryńyzdar, bir jyl jyldaǵydan azyraq paida tapsańyzdar eshteńe etpeidi, – degen aýdan basshysy maqta qabyldaý beketterindegi tarazydan aldaý, zerthanalarda maqta sapasyn qasaqana tómendetý sekildi jaǵdailarǵa jol berilmeý kerektigin eskertti.
Búginde aýdan aýmaǵynda ornalasqan maqta qabyldaýshy 7 maqta óńdeý zaýyttary men 77 maqta qabyldaý beketteriniń 45-i aýdan aýmaǵynda ornalasqan maqta óńdeý zaýyttaryna tiesili bolsa, qalǵan 32-si Maqtaral aýdany aýmaǵynda ornalasqan maqta óńdeý zaýyttaryna tiesili.
Maqta óńdeý zaýyttary ókilderiniń aitýynsha, ár kompaniia tikelei halyqaralyq maqta saýdagerlerimen (treiderlermen) jumys isteidi. Al treiderler maqta talshyqtaryn satyp alý boiynsha aldyn ala kelisimshart jasap, qarjylandyrady. Sol sebepti, maqtany shikizat kúiinde satyp alýǵa qajetti qarajattyń barlyǵy derlik jeke investitsiialar deýge bolady. Jiynǵa kelgen maqta zaýyt basshylary dál qazirgi kezde suranystyń joqtyǵyn alǵa tartty. Baǵa – maqta sapasyna bailanysty ekenin málimdedi.
Aýdan ákimi kezdesý barysynda zaýyt basshylaryna maqtany tazalaýmen qatar, qaita óńdeýmen ainalysýdy usyndy. Óitkeni, 79,3 myń gektar jerge aýyl sharýashylyǵy daqyldaryn ornalastyratyn aýdannyń 40,8 myń gektardan astam jerine maqta shiti egiledi.
Aita keteiik, maqtalyq alqaptarǵa defoliatsiialaý jumystary júrgizilip, kúzgi jiyn-terim naýqanyna 715 dana traktor, 897 dana traktor tirkemeleri, 61 dana OVH, 232 dana maqta terim mashinalary daiyn. 1665 tonna jeńildetilgen dizel otyny bólinip, aldyn ala boljam boiynsha gektarynan 25,8 tsentnerden ónim alynady dep josparlanyp otyr.
