Foto: Gov.kz
Túrkistan oblysynyń ákimi Darhan Satybaldynyń tapsyrmasyna sáikes oblys ákiminiń orynbasary Ertai Altaev pen oblystyq aýyl sharýashylyǵy basqarmasynyń basshysy Nurbek Badyraqov Jetisai aýdanyna issaparmen baryp, maqta alqaptary men maqta zaýyttarynda boldy. Sharýalar men diqandarmen erkin formatta tildesip, usynys-pikirlerin tyńdady, dep habarlaidy «Ult aqparat».
Kezdesý barysynda kúzgi jaýyn-shashynǵa qaldyrmai maqta terim naýqanyn sapaly uiymdastyrý, kúzgi jiyn-terimge beriletin memlekettik qoldaýlardy óz ýaqytynda kórsetý, maqta baǵasy men basqa da máseleler saralandy. Maqta qabyldaý beketterindegi tarazydan aldaý, zerthanalarda maqta sapasyn qasaqana tómendetý sekildi jaǵdailarǵa jol bermeý maqsatynda maqta qabyldaý beketterindegi tarazylar tekserildi.
Maqta óńdeý zaýyttary basshylarynyń aitýynsha, ár kompaniia tikelei halyqaralyq maqta saýdagerlerimen (treiderlermen) jumys isteitindikten maqta talshyqtaryn shikizat kúiinde satyp alýǵa qajetti qarajattyń, jeke investorlar tarapynan suranystyń joqtyǵyn alǵa tartty. Baǵa – maqta sapasyna bailanysty ekenin málimdedi.
Sharýalarmen júzdesý barysynda óńir basshysynyń tapsyrmasy aiasynda maqta klasterin damytýǵa kúsh salynǵany, bul baǵytty barynsha damytý mańyzdy ekeni aityldy.
Negizgi tabysy men kúnkórisi agrosektormen tikelei bailanysty Jetisai aýdanynda biylǵy jyly 79,3 myń gektar jerge egilgen aýyl sharýashylyǵy daqyldarynyń 40,8 myń gektarǵa jýyǵy maqta daqyly bolsa, 19,7 myń gektary baqsha, 3,4 myń gektary kókónis, 7,3 myń gektary dándik júgeri men 6,6 gektar egistigi mal azyqtyq daqyldary. Egilgen aýyl sharýashylyǵy daqyldarynan 544,5 myń tonna baqsha, 88,3 myń tonna kókónis, 40,3 myń tonna dándik júgeri men 99,2 myń tonna mal azyqtyq ónimderi alynǵan. Naýqanǵa 715 dana traktor men 897 dana traktor tirkemeleri, 61 dana OVH men 232 dana maqta terim mashinalary daiyn.
Ótken jyly 45 myń gektarǵa maqta shitin seýip, 122 myń tonna aq ulpa jinaǵan jetisailyq sharýalar biylǵy jyly da sol mejeni oryndaýǵa nietti. Óitkeni, ónim sapasyn arttyryp, aǵyn sýdy únemdeýdiń tiimdi tehnologiiasy sanalatyn tamshylatyp sýǵarý ádisi biyldyń ózinde aýdanda 2 myń gektarǵa artqan. Onyń 300 gektardan astamy maqta daqylyn óndirýshilerdiń enshisinde.
