Foto: Túrkistan oblysy ákiminiń baspasóz qyzmeti
Túrkistan oblysynyń ákimi Darhan Satybaldynyń tóraǵalyǵymen aýdan, qalalardyń damý josparyn talqylap, bekitý jumystary jalǵasýda. Búgin Sozaq aýdanynyń ákimi Muhit Turysbekov aimaqtyń 2024-2030 jyldarǵa arnalǵan áleýmettik-ekonomikalyq damýy týraly baiandady, dep habarlaidy «Ult aqparat».
Negizgi indikatorlar men ekonomikany alǵa súireitin salalar saraptalyp, tereń taldandy. Oblys ákimi tarapynan damý josparyn tolyqtyrý týraly tapsyrma berilip, sala basshylarynyń usynystary tyńdaldy.
– Bekitilgen damý josparyn oryndaý boiynsha Jol kartasy bekitilip, ol tiianaqty ári sapaly oryndalýy tiis. Sozaq aýdanynda óndiristi damytý mańyzdy. Taý-ken salasynda múmkindik mol. Týrizmdi damytýǵa da kúsh salǵan jón. Aýdan ákimdigi men basqarmalar birlese jumys atqarýy qajet, – dedi Darhan Satybaldy.
Aýdan ákiminiń aitýynsha, Sozaq aýdany boiynsha 2024-2030 jyldarǵa jalpy quny 640 mlrd. 757 mln. teńgege 38 investitsiialyq jobany iske asyrý josparlanýda. Ashylatyn jumys oryndary – 2 989 adam. Salyqtyq túsimder 1 mlrd 987 mln. teńge bolady dep boljanyp otyr. Ónerkásip salasynda jalpy quny 636,2 mlrd. teńgege 15 joba júzege asyp, 2 803 adam jumyspen qamtylady. Salyqtyq túsimder 1 mlrd. 850 mln. teńge bolady dep kútilýde. Agroónerkásip kesheni salasynda 19 joba júzege asady. Jalpy quny 3,7 mlrd. teńge, jumys orny – 151 adam. Týrizm salasynda jalpy quny 810 mln. teńge bolatyn 4 joba júzege asyrylyp, 35 jumys orny ashylady dep kútilip otyr. Barlyq salada jumys kúsheitilip, naqty josparlar qoiylady.
Iske asyrylatyn investitsiialyq jobalardyń nátijesinde jalpy óńirlik ónim kólemin jyl saiyn 6,8 paiyzǵa ósirý arqyly 6 jylda 1,5 esege arttyrý kózdelgen. Onyń ishinde ónerkásip salasy boiynsha 2030 jylǵa deiin jyl saiyn 6,5 paiyz ósim berip, 1,5 esege arttyrý, aýyl sharýashylyǵy salasy boiynsha jyl saiynǵy ósimdi 12,5 paiyzǵa, iaǵni 2 esege arttyrý josparlanyp otyr. Bul jospardyń oryndalýy oblys ákiminiń baqylaýynda bolady.
