فوتو: تٷركٸستان وبلىسى ەكٸمٸنٸڭ باسپاسٶز قىزمەتٸ
تٷركٸستان وبلىسىنىڭ ەكٸمٸ دارحان ساتىبالدىنىڭ تٶراعالىعىمەن اۋدان, قالالاردىڭ دامۋ جوسپارىن تالقىلاپ, بەكٸتۋ جۇمىستارى جالعاسۋدا. بٷگٸن سوزاق اۋدانىنىڭ ەكٸمٸ مۇحيت تۇرىسبەكوۆ ايماقتىڭ 2024-2030 جىلدارعا ارنالعان ەلەۋمەتتٸك-ەكونوميكالىق دامۋى تۋرالى باياندادى, دەپ حابارلايدى «ۇلت اقپارات».
نەگٸزگٸ ينديكاتورلار مەن ەكونوميكانى العا سٷيرەيتٸن سالالار ساراپتالىپ, تەرەڭ تالداندى. وبلىس ەكٸمٸ تاراپىنان دامۋ جوسپارىن تولىقتىرۋ تۋرالى تاپسىرما بەرٸلٸپ, سالا باسشىلارىنىڭ ۇسىنىستارى تىڭدالدى.
– بەكٸتٸلگەن دامۋ جوسپارىن ورىنداۋ بويىنشا جول كارتاسى بەكٸتٸلٸپ, ول تيياناقتى ەرٸ ساپالى ورىندالۋى تيٸس. سوزاق اۋدانىندا ٶندٸرٸستٸ دامىتۋ ماڭىزدى. تاۋ-كەن سالاسىندا مٷمكٸندٸك مول. تۋريزمدٸ دامىتۋعا دا كٷش سالعان جٶن. اۋدان ەكٸمدٸگٸ مەن باسقارمالار بٸرلەسە جۇمىس اتقارۋى قاجەت, – دەدٸ دارحان ساتىبالدى.
اۋدان ەكٸمٸنٸڭ ايتۋىنشا, سوزاق اۋدانى بويىنشا 2024-2030 جىلدارعا جالپى قۇنى 640 ملرد. 757 ملن. تەڭگەگە 38 ينۆەستيتسييالىق جوبانى ٸسكە اسىرۋ جوسپارلانۋدا. اشىلاتىن جۇمىس ورىندارى – 2 989 ادام. سالىقتىق تٷسٸمدەر 1 ملرد 987 ملن. تەڭگە بولادى دەپ بولجانىپ وتىر. ٶنەركەسٸپ سالاسىندا جالپى قۇنى 636,2 ملرد. تەڭگەگە 15 جوبا جٷزەگە اسىپ, 2 803 ادام جۇمىسپەن قامتىلادى. سالىقتىق تٷسٸمدەر 1 ملرد. 850 ملن. تەڭگە بولادى دەپ كٷتٸلۋدە. اگروٶنەركەسٸپ كەشەنٸ سالاسىندا 19 جوبا جٷزەگە اسادى. جالپى قۇنى 3,7 ملرد. تەڭگە, جۇمىس ورنى – 151 ادام. تۋريزم سالاسىندا جالپى قۇنى 810 ملن. تەڭگە بولاتىن 4 جوبا جٷزەگە اسىرىلىپ, 35 جۇمىس ورنى اشىلادى دەپ كٷتٸلٸپ وتىر. بارلىق سالادا جۇمىس كٷشەيتٸلٸپ, ناقتى جوسپارلار قويىلادى.
ٸسكە اسىرىلاتىن ينۆەستيتسييالىق جوبالاردىڭ نەتيجەسٸندە جالپى ٶڭٸرلٸك ٶنٸم كٶلەمٸن جىل سايىن 6,8 پايىزعا ٶسٸرۋ ارقىلى 6 جىلدا 1,5 ەسەگە ارتتىرۋ كٶزدەلگەن. ونىڭ ٸشٸندە ٶنەركەسٸپ سالاسى بويىنشا 2030 جىلعا دەيٸن جىل سايىن 6,5 پايىز ٶسٸم بەرٸپ, 1,5 ەسەگە ارتتىرۋ, اۋىل شارۋاشىلىعى سالاسى بويىنشا جىل سايىنعى ٶسٸمدٸ 12,5 پايىزعا, ياعني 2 ەسەگە ارتتىرۋ جوسپارلانىپ وتىر. بۇل جوسپاردىڭ ورىندالۋى وبلىس ەكٸمٸنٸڭ باقىلاۋىندا بولادى.
