Foto: okg.kz
Oblys ákimdiginde Shardara aýdanynyń 2030 jylǵa deiingi damý jospary talqylandy. Óńir basshysy Darhan Satybaldy Shardara aýdanynyń geografiialyq erekshelikterin, sý qoimasyn, sýarmaly alqaptaryn tiimdi paidalaný kerektigin aitty.
– Shardara aýdanynda sýarmaly jer kólemi mol. Egin sharýashylyǵyn damytý, egistikti ártaraptandyrý boiynsha múmkindik óte joǵary. Sony durys paidalanǵan jón. Investitsiia tartý jumystaryn kúsheitý qajet. Biz bul damý josparyn ne úshin ázirlep otyrmyz? Naqty indikator qoiyp, ár jylǵa bólip, bekitip almasaq, jumys júieli bolmaidy. Ideia tabylsa, qarjy tapshy, qarjy tabylsa, jobalar bolmai qalmaýy úshin 6 jylǵa jospar jasadyq. Osyny júzege asyrý úshin barlyq basqarma ózderi jaýapty salalary boiynsha jumys isteidi, infraqurylym tartý jáne taǵy basqa máselelerdi sheshedi. Sonda ǵana jobalar iske asyp, aimaqtyń ekonomikasy kóteriledi, – degen Darhan Amangeldiuly jaýapty tulǵalarǵa tiisti tapsyrmalar júktedi.
Shardara aýdanynyń ákimi Arman Qarsybaevtyń aitýynsha, aýdandy damytýda 4 baǵyt tańdalǵan. Olar: týrizm, aýyl sharýashylyǵy, ónerkásip jáne balyq sharýashylyǵy. 2024-2030 jyldar aralyǵynda aýdanda 154 investitsiialyq joba júzege asyp, 4 myńǵa jýyq jumys orny qurylady. Jobalardyń jalpy quny 210 mlrd. teńgeden asady. Ónerkásip jáne saýda salasynda 49 joba, týrizm – 16, balyq sharýashylyǵy – 75 jáne aýyl sharýashylyǵy salasynda 14 joba josparlanǵan. Nátijesinde 2030 jylǵa deiin aýdanǵa tartylǵan investitsiia kólemi 3,2 ese ósedi. Ónerkásip salasynda 27 joba júzege asyp, zaýyttar men óndiris oryndary kóbeiedi. 2300-ge jýyq adam jumyspen qamtylmaq. Osylaisha, ónerkásip ónimin 100 mlrd. teńgege jaqyndatyp, 4 ese ósirý kózdelip otyr. Aýdanda egistikti ártaraptandyrý, kókónisti, dándi daqyldardy tereń óńdeý salalary boiynsha da jumystar atqarylady.
Májiliste kásipkerlik, aýyl sharýashylyǵy jáne ózge de basqarma basshylarynyń usynys-pikirleri tyńdalyp, josparǵa engizildi.
