Foto: Gov.kz.
Túrkistan oblysynda maqta sharýashylyǵyn damytýǵa basymdyq berilýde. Bul baǵytta tolyq tsikldi 9 maqta-toqyma klasterin qurý jumystary bastaldy. Maqta ónimdiligi men sapasyn arttyrý jumystary Ordabasy aýdanynda da atqarylyp jatyr, dep habarlaidy «Ult aqparat».
Ordabasy aýdanyna issapar barysynda oblys ákimi Darhan Satybaldy Tórtkúl aýylynda ornalasqan maqta óńdeý zaýytynyń jumysymen, ondaǵy tehnikalarmen tanysty. Oblys ákimi óńirde maqta klasterin qurý baǵytynda aýqymdy jumystar atqarylyp jatqanyn aityp, ónim sapasyn arttyrýǵa, investorlar tartýǵa jan-jaqty qoldaý kórsetiletinin jetkizdi.
Zaýyt basshysy jańa jobalardy tanystyryp, aldaǵy josparlarymen bólisti. Onyń aitýynsha, kásiporynda ónimdilikti jáne maqta sapasyn arttyrý maqsatynda túrkiialyq uryqtar egiledi. Kelesi jyldan bastap 250 gektar aýmaqqa tamshylatyp sýarý tehnikalaryn endirý kózdelip otyr. 2025-2026 jyldary zaýyt qaita jańǵyrtýdan ótkizilmek. 2027 jyly maqta klasterin qurý josparlanýda.
«Nur-Agro 73» JShS maqta talshyǵyn óndiredi. Joba quny – 255,0 mln teńge. Óndiris qýattylyǵy jylyna – 35 000 tonna. Jeke kásipker 300-den asa azamatty jumyspen qamtyp otyr.
2023 jyly maqta zaýytynda 18 myń tonna maqta óńdelip, 6 myń tonna maqta talshyǵy Baltyq jaǵalaýy elderine, Resei jáne Belarýs memleketterine eksportqa shyǵarylǵan.
Aita keteiik, Túrkistan oblysy respýblikada maqta daqylyn ósiretin jalǵyz óńir. Maqta sharýashylyqtarynda 25 myń agroqurylymda 70 myńǵa jýyq adam eńbek etedi. Biyl maqta daqylynyń egis kólemi 106,4 myń gektardy qurady. Bul jalpy egistiktiń 12 paiyzy.
