Túrkistan oblysynyń ákimi Darhan Satybaldy Qazaqstan kásipkerleriniń quqyqtaryn qorǵaý jónindegi ýákil Rýstam Júrsinov jáne «Atameken» UKP Basqarma tóraǵasynyń orynbasary Erbol Óstemirovpen kezdesti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Kezdesýde óńirde kásipkerlikti damytý, qoldaý kórsetý jáne ózge de máseleler talqylandy. Óńir basshysy kásiporyndar men jańa jumys oryndaryn ashý basym baǵyt ekenine toqtaldy.
«Túrkistan oblysynda óndiris oryndaryn ashý, kásipkerlikti órkendetý joldaryn qarastyryp jatyrmyz. Indýstrialdy aimaqtardyń infraqurylym máselesi de zerdelenýde. Óńirde iri zaýyttar az. Investorlar tartý boiynsha jumystar qolǵa alyndy. Qazir jastardy eńbekke tartý, olardy yntalandyrý baǵytyndaǵy jobalardy kúsheitken jón. Bul rette «Atameken» kásipkerler palatasymen birlese jumys atqarýǵa daiynbyz», – dedi Darhan Satybaldy.
Rýstam Júrsinov barlyq óńirdi aralap kele jatqanyn aita kele Túrkistanda shaǵyn kásipkerlikti damytýǵa múmkindik mol ekenin atap ótti.
«Túrkistan óńiriniń basty bailyǵy – adami kapital. Jumys kúshi jetkilikti. Qiyndyqtar bar ekenin de bilemiz. Búgin kásipkerlermen kezdesip, olardyń máselelerin, ótinishterin tyńdadyq. Óńirdegi kásipkerlik palatalary ákimdiktermen birge kásipkerlikti damytý jumysyna atsalysady. Bizdiń maqsatymyz – kásipkerlikti damytý, halyqtyń ál-aýqatyn arttyrý», – dedi Rýstam Júrsinov.
Búgingi tańda oblysta 170 myńnan astam myń shaǵyn jáne orta biznes sýbektileri jumys istep tur. Biyl olardyń sany 26,5 myńǵa artty. Turǵyndardy kásipkerlikke baýlý, nesielendirý jumystary jalǵasyp jatyr.
