Foto: okg.kz
Túrkistan qalasynda qajyrly eńbekterimen qoǵamnyń áleýmettik turaqtylyǵyna qomaqty úles qosyp kele jatqan aýyl sharýashylyǵy qyzmetkerleri kúnine orai AGROFEST TÚRKISTAN – 2024 saltanatty sharasy ótti. Bul kúni ala jazdai rizyq-nesibesin jerden tergen óńir diqandarynyń 3000 tonnadan astam ónimderi halyqqa usynyldy.
Merekelik sharada «Kerýen sarai» týristik kesheninde asyl tuqymdy mal sharýashylyǵy men tehnikalar kórmesi jáne aýyl sharýashylyǵy ónimderiniń jármeńkesi uiymdastyryldy.
Aýqymdy is-sharaǵa qatysqan oblys ákimi Darhan Satybaldy aýyl sharýashylyǵy tehnikalar kórmesin kórip, «Turan sý», «Veterinariialyq qyzmet» memlekettik-kommýnaldyq kásiporyndaryna arnaiy tehnikalar tabystady. Aýyl sharýashylyǵy ónimderi jármeńkesin aralap, kolóner sheberleriniń jumystarymen jáne mal sharýashylyǵy kórmesimen tanysty. Eńbek adamdaryna qurmet kórsetken oblys ákimi aýyl sharýashylyǵy salasy ókilderin quttyqtady.
«Halyqtyń ál-aýqatynyń joǵary bolýy – agroónerkásiptik kesheniniń damýymen tyǵyz bailanysty. Sizderdiń eńbekterińizdiń arqasynda oblystyń agroónerkásip kesheni turaqty damyp keledi. Túrkistan oblysy agrarlyq salany damytýda elimizde jetekshi orynǵa turaqtaǵan. Aýyl sharýashylyǵynda elimizdegi jalpy ónim kóleminiń 14 paiyzy óndiriledi. Biyl 9 aida 747 mlrd. teńgege jýyq ónim óndirildi. Memleket basshysy Qasym-Jomart Kemeluly «Aýyl sharýashylyǵyn damytpai, básekege qabiletti ekonomika qurý múmkin emes» dep bul salaǵa erekshe mán berip otyr. Osy turǵyda, ónimdilikti arttyrý jáne jańa tehnologiialardy endirý baǵytynda, biz kórshiles Ózbekstan, Qytai jáne Túrkiia, Avstraliia memleketteriniń oń tájiribelerin endirýimiz qajet. Oblystyń tabiǵi-klimattyq qolailyǵy, jumys kúshi turǵysynda salany jan-jaqty damytýǵa mol múmkindikter bar. Zaman kóshinen qalmai, órleý úshin aldymyzǵa aýqymdy josparlar túzip, biik mejelerdi belgilep otyrmyz. Adal eńbekpen elimizdiń damýy men órkendeýine ólsheýsiz úles qosyp júrgenderińiz úshin sizderge alǵysymdy bildiremin. Ózderińizben birge, oblystyń agrarlyq salasynyń jańa baǵytta damýyna qol jetkizetindigimizge senimdimin. Óitkeni, Túrkistan óńiriniń eńbekqor eli, qunarly jeri bar. Sizderdi búgingi merekemen quttyqtai otyryp, zor densaýlyq, otbasylaryńyzǵa amandyq, bereke men birlik tileimin! Elimizdiń igiligi jolynda jańa tabystarǵa jete berińizder. Mereke qutty bolsyn!» dedi Darhan Satybaldy.
Saltanatty sharada oblys ákimi bir top azamatty Qazaqstan Respýblikasy Aýyl sharýashylyǵy ministrliginiń «Eńbek ardageri» medalimen, «Aýyl sharýashylyǵy salasynyń úzdigi» tósbelgisimen marapattady. Jiynda oblystyń agrarlyq salasynyń damýyna belsendi úles qosyp kele jatqan ozat agroqurylym basshylary men ókilderine de qurmet kórsetildi.
Sondai-aq, damý kórsetkishterimen alǵashqy úshtikke engen jáne negizgi kapitalǵa investitsiia tartýdan ozat aýdan, qala ákimderine oblys ákiminiń diplomy tabystaldy. Birinshi oryndy qaita óńdeý salasyn damytýda kósh bastap, oblystyq kórsetkishtiń oryndalýyn qamtamasyz etken Sairam aýdanyniń ákimdigi jeńip aldy. Ekinshi oryn Qazyǵurt aýdanynyń eńbekkerlerine buiyrsa, úshinshi orynǵa Jetisai aýdany laiyq dep tanyldy.
«AGROFEST TÚRKISTAN – 2024» merekelik is-sharasy Qazaqstannyń estrada juldyzdarynyń qatysýymen keshki gala-kontsertke ulasty
