Qazaqstan halqy Assambleiasy Keńesiniń keńeitilgen otyrysyna QR Prezidenti Qasym-Jomart Toqaev Túrkistan oblysynda Dostyq úiin salýdy tapsyrdy, dep habarlaidy QazAqparat.
Prezidenttiń tóraǵalyq etýimen ótip jatqan otyrysta birinshi bolyp Túrkistan oblysynda etnosaralyq ahýal talqyǵa tústi.
«Statistika boiynsha, Túrkistan oblysynda túrli turmystyq janjaldar az emes. Ózińiz de mysal retinde Shornaq, Qarabulaq eldi mekenderinde bolǵan oqiǵalar týraly aittyńyz. Turmystyq deńgeide bolsa da, dál osyndai jaǵdailarǵa basa mán berý kerek. Eń aldymen mundai oqiǵalar ulttyq sipatqa ulaspaýy qajet. Bul – birinshi másele. Ekinshi másele, Túrkistan oblysynda Dostyq úiin ashý kerek. Mundai úiler óńirlerdiń bárinde bar. Mundai úiler saltanatty májilisterdiń zalyna ainalmaýy kerek. Men bul týraly keiin keńirek aitam. Dostyq úileri sarapshylardy shaqyryp, týyndaityn problemalardy praktikalyq turǵyda talqylai alatyn halyq ókilderin qabyldaýy kerek. Osyǵan qatysty qandai josparlaryńyz bar», - dep surady Memleket basshysy Túrkistan oblysynyń ákiminen.
Oblys ákimi Ómirzaq Shókeev óńirde etnosaralyq ahýaldyń tamyryn basyp otyratyn monitoring ortalyq jemisti jumys istep turǵanyn atady.
«Shyn máninde jańaǵy Shornaqta, Qarabulaqta oqiǵa oryn aldy. Olardyń aldyn alý úshin bizde 2019 jyldan bastap etnosaralyq shielenisterdi tikelei zertteitin monitoringtik ortalyq ashyldy. Onda tek qana álimetterdi tek bilik oryndarynan emes, júieli áleýmettik jeliden, azamattardyń bergen ótinishterinen, shuǵyl málimet jinaityn qoǵamdyq oryndardan jinap, sony saraptaýǵa kóshti. Sonyń arqasynda 2019 jyly Shornaq eldi mekeninde osyndai táýekel bar ekenine kózimiz jetti. Sol jerde tiisti sharalar qoldanyp, eki jaqty qariialaryn jinap, olarmen máslihat ótkizip, sol jerdegi quqyq qorǵaý organdarynyń jumysyn nyǵaityp, áreket jasadyq. Sonyń arqasynda 2020 jylǵy kikiljiń de qantógis te bolmai, másele birneshe saǵattyń ishinde rettelgen bolatyn» - dedi aimaq basshysy.
Sondai-aq, ol Prezidenttiń eskertpesi boiynsha Túrkistan óńirinde jańa Dostyq úii salynatynyn aitty.
«Bizdiń assambleianyń Dostyq úii bolǵan. Biraq ol Shymkent qalasynda ornalasqan edi. Ony Shymkent qalasynyń suraýymen qala ákimdiginiń balansyna berdik. Qazir assambleia basqarmalar úiinde ornalasqan. Sizdiń aitqan eskertpelerińizdi eskere otyryp, jańa úlgidegi Dostyq úiin salamyz dep oilaimyn, - dedi Ómirzaq Shókeev.
