Foto: Gov.kz
Túrkistan oblysynda apatty jáne úsh aýysymdy mektepterdiń máselesin sheshý boiynsha jumystar qarqyndy júrgizilip keledi, dep habarlaidy «Ult aqparat».
Oblys ákimdiktiń baspasóz qyzmetiniń málimetinshe, biyl óńirde 20 mekteptiń qurylysyn júrgizýge oblystyq biýdjetten 14,7 mlrd teńge qarjy qaraldy. Onyń ishinde, 15 mekteptiń qurylysy 2023 jyldan 2024 jylǵa ótpeli bolsa, qalǵan 5 mekteptiń qurylysy biyl bastaldy. Jyl sońyna deiin 13 bilim uiasynyń qurylysyn aiaqtap, paidalanýǵa tapsyrý josparlanyp otyr. Bul nysandardyń qurylys barysy oblys ákimi Darhan Satybaldynyń qatań baqylaýynda tur.
Biyl jańa oqý jylynda 700 oryndyq 4 bilim uiasynyń ashylý saltanaty ótti. Atap aitsaq, Qazyǵurt aýdany, Qyzylqiia aýyl okrýgi, Ainatas eldi mekenindegi 100 oryndyq «Ainatas» mektebi men S.Rahymov aýyl okrýgi, Kókibel eldi mekenindegi 300 oryndyq bilim uiasy, Otyrar aýdanyndaǵy Baltakól aýyldyq okrýgi, Aqkól eldi mekeninde 100 oryndyq oqý ordasy, Tólebi aýdany, Birinshi Mamyr aýyldyq okrýgine qarasty Taǵaina eldi mekenindegi 200 oryndyq jalpy orta bilim beretin mektep paidalanýǵa tapsyryldy.
Budan bólek, qarasha-jeltoqsan ailarynda taǵy 3100 oryndyq 9 mekteptiń qurylys jumystary aiaqtalady dep kózdelýde.
Aita keteiik, Memleket basshysy Qasym-Jomart Toqaevtyń bastamasymen júzege asyrylatyn «Jaily mektep» jobasy aiasynda 2023-2025 jyldary Túrkistan oblysynda 63 mekteptiń qurylysy josparlanýda. Nátijesinde, 60 myńdai oqýshy zamanaýi bilim oshaqtarynda oqýǵa múmkindik alady.
