Túrkistan oblysy nege únemi ózge óńirlerden erekshe «jasyl» aimaqta turady? PTR test nátijesi men aýrý kórsetkishin jasyryp otyrǵan joqsyzdar ma? Ortalyq kommýnikatsiialar qyzmetinde Túrkistan oblysy qoǵamdyq densaýlyq basqarmasynyń basshysy Marat Pashimovqa osyndai suraq qoiyldy, dep habarlaidy QazAqparat.
«Iá, bul suraq bárine qyzyq. Siz ǵana emes, ministrimiz de únemi suraidy. Túrkistan oblysy 15 tamyzdan beri «jasyl» aimaqta ekenin aittym. Birinshiden, bizde vaktsinatsiia deńgeii óte joǵary. Ekinshiden, eshkim eshkimnen eshteńe jasyryp otyrǵan joq. Birneshe ret komissiia kelip teksergen bolatyn. Sol kezde de eshkim eshqandai derekti búrkemelep otyrmaǵany dáleldengen. Odan keiin bizde halyqtyń tyǵyz qonystanýy basymdyq bolyp tur qazir. Ózge óńirlerde halyq qalalarda tyǵyz shoǵyrlanǵan bolsa, bizde aýyldy eldi mekenderde halyq kóbirek qonystanǵan», - dedi basqarma basshysy.
Sondai-aq ol, epidaýhaldy oblys basshylyǵynyń tikelei baqylaýda ustaýy da tártiptiń bosańsymaýyna sebep bolyp turǵanyn jetkizdi.
«Sanitarlyq normanyń bárin saqtaý, bas sanitar dárigerdiń qaýlylaryn oryndaý da oń áser etedi. Óitkeni oblys ákimi bárin jeke baqylaýynda ustap otyr. Apta saiyn shtab keńesi ótedi. Ár shtab jiynynda bas sanitar dáriger ekeýimiz epidahýal týraly baiandap otyramyz. Ákim mobildi toptardyń jumysyn da tikelei qadaǵalaidy. Bul bárimizdiń ortaq iske jumylyp kirisýimizden dep oilaimyn. Árine, halyqtyń jaýapkershilikti, bári adamǵa bailanysty ekenin túsinýi de mańyzdy. Árkim ózinen bastaýy kerek. Sanitarlyq normalardy, vaktsinatsiia jáne áleýmettik qashyqtyqty saqtaý kerek», - degen vedomstvo basshysy oblysta PTR-test kórsetkishi de joǵary ekenin aitty.
«Al PTR test synamasynyń sanyna kelsek, respýblika boiynsha 3-4 myń test júrgizilse, biz bul kórsetkish boiynsha eń kóp test alatyn óńirlerdiń qataryndamyz. PTR testini ońdy-soldy alyp jatqan joqpyz. Belgili bir sanattardan alamyz. Onyń bári bas sanitardyń qaýlysymen retteledi», - dedi Marat Pashimov.
