Túrkistan oblysynyń taýlarynda joǵalǵan eki týristiń denesi tabyldy, - dep habarlady "Ult aqparat" TJM resmi ókili Talǵat Ýálige silteme jasap.
«29 mamyr kúni saǵat 00:30-da izdestirý jumystarynyń barysynda Ógem ózeninen bir adamnyń denesi tabyldy. Ol 1999 jyly týǵan, taýda joǵalyp ketken týrister tobynyń biri ekeni anyqtaldy. Ekinshi jigittiń denesi búgin Ógem ózeninen 3 shaqyrym jerden tabyldy» delingen habarlamada.
Jigitterdiń denesi «Qazaviaqutqarý» AQ MI-171 tikushaǵymen Shymkent qalasyna jóneltildi.
Qalǵan eki adamdy izdestirý jumystary jalǵasýda. Jerdegi izdestirýdi qutqarýshylar, politsiia qyzmetkerleri, shekara qyzmetiniń at patrýli, ulttyq park qyzmetkerleri jáne joǵalǵandardyń týystary júrgizýde. Sondai-aq, áýeden izdeý úshin QR TJM «Qazaviaqutqarý» AQ eki borty jumys isteýde.
Atalǵan fakti boiynsha Túrkistan oblysynyń politsiia departamenti sotqa deiingi tergeýdi bastady. Saraptamalar taǵaiyndaldy, olardyń nátijeleri boiynsha ólimniń sebebi anyqtalatyn bolady.
Eske salaiyq, Tólebi aýdanynyń Sairam-Ógem memlekettik ulttyq tabiǵi parkiniń aýmaǵynda 7 adamnyń joǵalǵany týraly habarlama 2021 jylǵy 25 mamyrda 18 saǵat 30 minýtta kelip tústi. Olardyń úsheýi keshe tabylǵan bolatyn. 21 mamyrda týrister jaiaý «Sary-aiǵyr» shatqalyna bet alǵan jáne 24 mamyrda qaitý qajet bolǵan. Alaida qaitar jolda adasyp ketken.
