Túrkistan oblysy Keles aýdany Ushqyn aýylynda 4 adam gazdan qaitys boldy. Olardyń bireýi – 4 jasar sábi. Bul jóninde 29 qarashada Túrkistan oblystyq tótenshe jaǵdailar departamenti habarlady, dep jazady Azattyq radiosy.
Qaiǵyly oqiǵa týraly habar 28 qarasha kúni túste kelgen. Úsh bólmeli úiden 4 adamnyń máiiti tabylǵan. Bireýi – 4 jasar sábi.
- Qaitys bolǵan eki adam Ushqyn aýylynyń turǵyny. Ekeýi – Shardara aýdanynan qonaqqa kelgen. Qazir oqiǵa ornynda tergeýshiler júr, - dedi Ushqyn aýyly okrýginiń ákimi Ǵalymjan Baidosov.
Qonaqqa kelgen 49 jáne 47 jastaǵy eki aǵaiyndy jigit Shardara aýdany Qosseiit aýylynan Ushqyn aýylyna aǵasynyń asyn berýge kelgen. Qaiǵyly oqiǵa bolǵan úide gazǵa arnalǵan, qoldan jasalǵan temir pesh bolǵan.
Politsiia qaiǵyly oqiǵa sebebin anyqtaý úshin sot-meditsinalyq saraptama taǵaiyndaǵan.
Qazaqstanda ásirese ot jaǵý maýsymy bastalǵan kezde gazdan ýlaný, ys tiiý, gaz ballony jarylysynan bolatyn kisi ólimi jii kezdesedi.
Biyl qarashanyń 16-syna Aqmola oblysy Shortandy kentinde gaz ballony jarylyp, 13 adam zardap shekken, 5 adam qaitys bolǵan. Beseýdiń úsheýi sábiler.
2018 jyly qarashada Túrkistan oblysynda bir táýlikte bes adam iis tiip qaitys bolyp, bes adam aýrýhanaǵa túsken. 2019 jyly aqpanda Túrkistan oblysy Keles aýdanynda bir otbasynyń tórt adamy ys tiip, qaitys bolǵan. Bily, 2021 jyly aqpanda Túrkistan qalasyndaǵy jeke turǵyn úilerdiń birinde tabiǵi gazdan ýlanyp, bes adam qaza bolǵan.
