Túrkistan oblysynyń Qazyǵurt aýdany Qaqpaq aýylynda balalarǵa arnalǵan qaiyrymdylyq sport zaly ashyldy. «Qazaqstan halqyna» qorynyń jobasy aiasynda aýyl balalary sport sektsiialaryna tegin qatysa alady.
Jańa sport zal jergilikti mektep aýmaǵynda ashyldy. Zal bólmesi mektep balansynda. Osyǵan deiin aýyl balalary kúres úiirmesine barǵanymen, turaqty jattyǵýlar ótkizý úshin qajetti jaǵdai jasalmaǵan edi. Sondyqtan turǵyndar, ásirese, balalar jańa zaldyń ashylýyn asyǵa kútti.
«Qazaqstan halqyna» qory «Batyr bolamyn» QQ-men birlesip júzege asyryp jatqan jobany estip, aýyl azamattary bolashaq zal ashylatyn ǵimaratty óz kúshterimen jóndeýden ótkizdi.
«Qazaqstan halqyna» qorynyń qoldaýymen úi-jai qajetti zamanaýi jabdyqtarmen, sporttyq múkámmalmen jáne jattyǵýǵa arnalǵan qural-jabdyqtarmen jaraqtandyryldy. Jańa sport zalda 80 bala erkin kúrespen ainalysýdy bastap ketse, boks sektsiiasyna qabyldaý bastaldy.
«Biz zaldyń ashylýyn asyǵa kúttik. Apta saiyn jattyǵamyz. Bárimizge qatty unaidy. Qaladaǵydai zaldardai óte keń jáne zamanaýi. Osyndai sport zaldy ashqan aǵalarymyzǵa raqmet!», – deidi sektsiiaǵa qatysýshylardyń biri Dosjan Azamat.
Qaqpaq aýylyndaǵy zal «Qazaqstan halqyna» qoǵamdyq qorynyń «Batyr bolamyn» qorymen seriktestikte «24 balalar sport zaly» qaiyrymdylyq jobasy aiasynda ashqan toǵyzynshy sport zal.
«Aýyl turǵyndary úshin balalarǵa arnalǵan tegin zaldyń ashylýy naǵyz merekege ainalady. Osyndai zor, ári igi istiń bir bóligi bolǵanymyzǵa qýanyshtymyz. Sektsiiada balalar densaýlyqtaryn nyǵaityp qana qoimai, dostyqtyń, ózara kómektiń, jattyqtyrýshylar men birge qatysyp jatqan balalardyń qoldaýynyń qundylyǵyn sezinedi dep senemiz», – dep atap ótti «Batyr bolamyn!» qorynyń vitse-prezidenti Ernur Sabykenuly.
Eske salsaq, «Qazaqstan halqyna» qory bastamashylyq etken «24 balalar sport zaly» qaiyrymdylyq jobasy elimizdiń shalǵaidaǵy eldi mekenderinde nemese sportqa qoljetimdilik deńgeii tómen aýyldyq jerlerde balalar sportynyń qoljetimdiligin arttyrýǵa, sondai-aq balalardy adamgershilikke tárbieleýge baǵyttalǵan. Jobanyń maqsatty aýditoriiasy – az qamtylǵan jáne kóp balaly otbasylardan shyqqan 5 jastan 18 jasqa deiingi balalar, sondai-aq damý ereksheligi (inkliýzivtiligi) bar balalar.
24 zaldy ashýǵa Qor 183 623 000 teńge bóldi. Búgingi tańda elimiz boiynsha toǵyz zal ashylǵan jáne jumys isteidi: Aqmola oblysy, Tselinograd aýdany, Tasty kenti; Almaty oblysy, Uiǵyr aýdany, Avat kenti; Mańǵystaý oblysy, Beineý aýdany, Beineý kenti; Mańǵystaý oblysy, Beineý aýdany, Aqjigit kenti; Jetisý oblysy, Sarqan aýdany, Cherkassk kenti; Qaraǵandy oblysy, Nura aýdany, Izendi kenti; Almaty oblysy, Eńbekshiqazaq aýdany, Qazaqstan aýyly; Túrkistan oblysy, Qazyǵurt aýdany, Qaqpaq aýyly.
