Túrkistan oblysynyń ákimi Darhan Satybaldynyń tapsyrmasymen barlyq aýdan ortalyqtarynda zamanaýi úlgidegi mádeni oshaqtar boi kóteredi. «Jańa býyn ortalyǵy» dep atalatyn mádeniet oshaqtar kópfýnktsionaldy bolady. Onda balalardy jan-jaqty damytýǵa kúsh salynady. Bul aýyl turǵyndary úshin óte úlken qoldaý ári tamasha syilyq bolmaq.
Oblys ákiminiń halyqpen kezdesýinde jii kóteriletin máseleni júzege asyrý úshin óńir basshysy Darhan Satybaldy jańa mádeniet oshaqtarynyń jobalarymen tanysty. Biregei jobanyń tujyrymdamasyn bekitti. Jaýapty basshylarǵa naqty tapsyrmalar berdi.
«Aýdandarda halyqpen kezdesýde mádeniet úiin ashý týraly usynystar kóp aitylady. Oilana kele, aýyl balalarynyń bilimin arttyryp, bos ýaqytyn tiimdi paidalaný úshin kópsalaly erekshe ortalyqtar ashý týraly sheshimge keldik. Onda kelgen eresekter de, balalar da ózin óte jaily sezinýi kerek. Balany ǵylymǵa jetelep, mádeniet pen sportqa baýlityn, ulttyq qundylyǵymyzdy úiretetin ortalyqty barlyq aýdanda ashýdy kózdep otyrmyz. Bizdiń óskeleń urpaq bilimdi, ziialy, mádenietti, deni saý ári ónerli bolyp ósýge tiis», – dedi oblys ákimi.
Aýqymdy qurylys keler jyldyń basynda ońtústik aýmaqtardan bastalmaq. Alǵashqy ortalyqtar Jetisai, Maqtaaral, Saryaǵash pen Keles aýdandarynda salynady. Oblys basshysynyń maquldaýymen ornalasatyn orny anyqtalýda. Jańa býyn ortalyqtary aýdan ortalyqtarynda, saiabaqtarǵa jaqyn aýmaqta boi kóteredi.
2 qabatty ǵimaratta saltanatty jiyndar ótkizýge arnalǵan májilis zaly bolady. Sonymen birge ǵylymdy damytýǵa baǵyttalǵan kibernetika, robototehnika men fab-lab steam ortalyqtary ashylady. Óner, shyǵarmashylyq pen sport salalary boiynsha úiirmeler jumys isteidi. Shahmat, toǵyzqumalaq jáne ústel tennisi úiirmeleri ashylady. Amfiteatr men oiyn alańdary salynady.
Qoryta aitqanda, bul ortalyqtar kitaphana, mádeniet úii jáne oqýshylar saraiynyń mindetin atqarady. Oblys ákimi árbir ǵimaratty talapqa sai etip, janashyrlyqpen salýdy tapsyrdy. Atalǵan ortalyqtar adami áleýetti attyrady degen senim mol.
