Túrkistan oblysynyń ákimi Janseiit Túimebaev IýNESKO-nyń Almatydaǵy klasterlik biýrosynyń delegatsiiasymen kezdesti, dep habarlaidy "Ult aqparat".
Aimaq basshysy top quramyn bastap kelgen IýNESKO-nyń Parijdegi tarihi qalalyq landshafttar jónindegi keńesshisi Kristina Iamandige óńirdegi jańalyqtardyń jaiyn túsindirip ótti, dep habarlaidy QazAqparat tilshisi.
Oblys ákimi kezdesý barysynda delegatsiia ókilderine Túrkistan oblysynyń qaita qurylyp, jańarǵan tusynda kelgenine rizashylyǵyn bildirdi.
«Túrkistan oblysy men IýNESKO-nyń óńirimizdiń áleýetin arttyryp, odan ári damytýda múmkindikteri zor dep bilem. Jyldyń basynda biz Sizdermen «Mýzei isi» mamandaryn oqytý boiynsha birlesken treningter ótkizdik. Búginde ózderińiz QR Mádeniet jáne sport ministrliginiń qoldaýymen «Ortalyq Aziiadaǵy tarihi qalalyq landshafttarǵa baǵyttalǵan tásildi engizý arqyly Túrkistandaǵy Qoja Ahmet Iassaýi kesenesin tehnikalyq qoldaý» Ulttyq seminaryn ótkizýdi bastadyńyzdar. Osy jyly Krista Pikkat hanymmen kezdesýde bizder materialdyq jáne materialdyq emes mádeni murany qorǵaý, sondai-aq IýNESKO-nyń usynysymen tikelei iske asyrylatyn mamandardy daiarlaý men olardy oqytý máselelerindegi jumysty tereńdetýge ýaǵdalastyq. Osyǵan bailanysty, IýNESKO-nyń Parijdegi keńsesi men Kristina Iamandi hanymnyń oblysymyzǵa sapary úshin jeke alǵysymdy bildirgim keledi», - dedi aimaq basshysy.
Otyrysta taraptar Túrkistan oblysy men onyń ortalyǵy Túrkistan qalasy jóninde áńgimelesti. IýNESKO-nyń Q.A.Iassaýi keshenin naqty aýmaqtyq bailanystyrý jáne ony Túrkistan oblysynyń ortalyǵy retinde Túrkistan shaharynyń jalpy damý dinamikasyna biriktirý qajettigi týraly qorytyndyǵa kelgeni oblys úshin óte mańyzdy ekenin alǵa tartqan J.Túimebaev uiym tarapynan usynylatyn bastamalardy jan-jaqty, tolyq qoldaýǵa ázir ekenin jetkizdi. Bul rette, naqty nátijege qol jetkizý úshin jumystardy sheberlik saǵaty, sarapshylar men mamandardyń basyn qosqan seminarlar túrinde uiymdastyrýdy usyndy.
