Túrkistan oblysynyń ákimi Ómirzaq Shókeev otstavkaǵa ketýge ótinish berdi. Aqparatty oblys ákimdiginiń baspasóz qyzmeti rastady, - dep habarlaidy Tengrinews.kz.
Baspasóz qyzmeti málimetinshe, oblys ákimi ótinishti 24 tamyzda jazǵan.
Eske salaiyq, 13 shildede sot Kentaý qalasynyń burynǵy ákimi Dáýren Mahajanovty para alǵany úshin kináli dep tanyp, 10 jylǵa bas bostandyǵynan aiyrǵany belgili boldy.
Bul rette, óńir basshysy maýsymdaǵy brifingte Kentaý qalasynyń burynǵy ákimi Dáýren Mahajanovtyń kinási sotta dáleldense, otstavkaǵa ketýge ótinish beretinin málimdegen edi.
Ómirzaq Shókeev Túrkistan oblysynyń ákimi bolyp 2019 jyly aqpanda taǵaiyndalǵan bolatyn.
Ómirzaq Estaiuly Shókeev 1964 jyly 12 naýryzda Túrkistan oblysy Báidibek aýdany Shaian qalasynda dúniege kelgen. Ol Máskeý ekonomikalyq-statistikalyq institýtyn bitirgen. Institýtty bitirgennen keiin QazKSR Memlekettik josparlaý janyndaǵy AÁK ǴZI kishi ǵylymi qyzmetkeri; QR Prezidenti janyndaǵy Joǵary ekonomikalyq keńestiń keńesshisi; QR Prezidenti Apparaty men Ministrler Kabineti Qarjy jáne eńbek bólimi meńgerýshisiniń orynbasary; OQO ákimshiligi basshysynyń orynbasary. Ár jyldary QR ekonomika ministri; QR ekonomika jáne saýda ministri; QR premer-ministriniń orynbasary; "Bank Týran-Álem" JAQ basqarma tóraǵasy boldy"; QR Prezidenti Ákimshiligi basshysynyń orynbasary qyzmetterin atqardy.
Ár jyldary Qostanai oblysynyń ákimi, Astana qalasynyń ákimi jáne Ońtústik Qazaqstan oblysynyń ákimi bolǵan. 2007 jyly tamyzda Shókeev Qazaqstan premer-ministriniń orynbasary bolyp taǵaiyndaldy. 2011 jyldan bastap 2017 jylǵa deiin "Samuryq-Qazyna" ulttyq ál-aýqat qoryn (UÁQ) basqardy.
