Foto: Gov.kz.
Túrkistan oblysynyń ákimi Darhan Satybaldynyń tóraǵalyǵymen agroónerkásip kesheninde investitsiialyq jobalardy júzege asyrý máselesi talqylanǵan májilis ótti, dep habarlaidy «Ult aqparat».
Aýyl sharýashylyǵy salasynda júzege asyp jatqan jáne alda qolǵa alynatyn jobalar týraly maǵlumat berilip, jaýapty basshylardyń esepteri tyńdaldy. Óńir basshysy aýdan, qala ákimderi men Oblystyq aýyl sharýashylyǵy basqarmasynyń basshysyna, «Túrkistan» ÁKK basshylyǵyna tiisti tapsyrmalar berdi.
– Bizge tyń ideialar men jańa jobalar qajet. Barlyq aýdan, qala ákimi aýyl sharýashylyǵyna investitsiia tartyp, ónimdi tereń óńdeýge basymdyq berýi tiis. Sý únemdeý tehnologiiasyn engizý, jańa tásilderdi qoldaný, egistikti ártaraptandyrý mańyzdy. Naqty jospar, júieli jumys qajet, – dedi Darhan Satybaldy.
Májiliste Oblystyq aýyl sharýashylyǵy basqarmasynyń basshysy Nurbek Badyraqov pen jaýapty basshylardyń baiandamalary tyńdaldy. Agroónerkásip kesheniniń ár salasy boiynsha tartylatyn investitsiia boiynsha maǵlumat berildi.
2024 jyldyń 10 aiynda agroónerkásip kesheniniń negizgi kapitalyna 130 mlrd teńge tartylyp, ótken jyldyń osy kezeńimen salystyrǵanda 1,5 ese artty. 2024-2030 jyldary aralyǵyndaǵy óńirde aýyl sharýashylyǵyna 556 mlrd teńge investitsiia tartylyp, 336 joba júzege asady dep josparlanǵan. Osy arqyly 12 myńnan asa jumys ornyn ashý kózdelgen. Al biylǵy 10 aida AÓK-te 30 joba júzege asyp, 237 jumys orny ashyldy.
Oblys ákimi josparlar qaǵaz júzinde qalmai naqty iske asýy kerektigin aitty. Aýdan, qala ákimderine osy baǵyttaǵy jumysty kúsheitý jóninde tapsyrma berdi. Jobalar áli de júielenip, tiisti jumystar atqarylady.
