Túrkistan oblysynda tasqyn sý Saryaǵash aýdanynyń Baǵys aýylyn da shaiyp ketken. Bul týraly óńirdiń TJD málimet taratty, dep habarlaidy QazAqparat.
Kúni keshe qatty jaýyn saldarynan Qazyǵurt aýdanynyń 4 eldi mekenin sý shaiyp ketken bolatyn. Topan sý Saryaǵash aýdanynyń Baǵys aýylynda 53 úidiń aýlasyna, 18 úidiń, 1 toihananyń, 16 sharýashylyq qurylystyń ishine sý kirgeni anyqtalyp otyr. Sý basqan aýmaqtardan 50 adam evakýatsiialanyp, barlyǵy týystarynyń úilerine taraldy. Sondai-aq úi janýarlary qyrylǵan, sany anyqtalýda. Qazir bul aýmaqtarda jergilikti atqarýshy jáne tótenshe jaǵdai bóliminiń qyzmetkerleri tarapynan aýmaqtan sý soryp shyǵarý jumystary júrgizilýde.
«Aýdandyq órt sóndirý bólimi men beketteriniń, jergilikti aýyl ákimdikterdiń uiymdastyrýymen sý sorǵyshtar kósheler men úidiń aýlalaryna tolǵan sýdy shyǵarý jumystarymen ainalysýda. Jumysqa TJ Tótenshe jaǵdailar departamentiniń 56 qyzmetkeri, 9 birlik tehnika, 11 motopompa jáne jergilikti atqarýshy organdardyń 19 qyzmetker, 6 birlik tehnika, 2 motopompa kúshterimen sýdy sorý jáne aryqtardy tazalaý jumystary júrgizilýde. Sonymen qatar kóshelerdi, úilerdiń aýlalaryn sý basý faktisine bailanysty aýdan ákimdiginiń jedel jelisi iske qosylyp, turǵyndar tarapynan habarlamalar túsken jaǵdaida shuǵyl is-sharalar atqarylýda» delingen oblystyq TJD baspasóz qyzmeti taratqan habarlamada.
