Túrkistan oblysyndaǵy Tólebi, Qazyǵurt, Báidibek aýdandarynda jalpy sany 522 úidiń aýlasyn sý shaiyp, 258 adam evakýatsiialanǵan. Bul týraly oblys ákiminiń orynbasary Sáken Qalqamanov óńirlik kommýnikatsiia qyzmetiniń alańynda málimdedi, dep habarlaidy "Ult aqparat".
Oblys ákimi orynbasarynyń aitýynsha, apat bolǵan aýdanda taýly aýdandarda nóser jaýynnyń saldarynan sel tasqyny oryn alǵan. Saldarynan 4 úidi sý basyp, turǵyn úilerden 1077 m3 sý shyǵarylǵan.
«Tólebi aýdanyndaǵy Qasqasý ózeninde sý deńgeiiniń kóterilýinen 4 úi, 376 aýla aýmaǵyn sý basty. Jergilikti mańyzy bar tórt kópirdi sý shaiyp ketti. 8 bas iri qara jáne usaq mal shyǵyny boldy. Aýdan ortalyǵy Lengir qalasyndaǵy 20 aýla sý astynda qaldy. №5 kásibi tehnikalyq kolledj bazasynda zardap shekken Sultanrabat aýylynyń 150 turǵynyna evakýatsiialyq pýnkt uiymdastyryldy. Ol jerge 70 adam jaiǵastyryldy. Onyń 32-si balalar. Taǵy 80 adam jaqyn mańdaǵy týystarynyń úiine ornalasty. Qosymsha Kóksáiek eldi mekeninde ornalasqan №9 kópsalaly kolledjinde 150 adamǵa arnalǵan evakýatsiialyq pýnkt daiyndaldy», - dedi Sáken Qalqamanov.
Oblystyq TJD málimetinshe, Qazyǵurt aýdanynda 6 úidiń aýlasy men Qarjan aýylyndaǵy «Sembi» emhanasynyń aýmaǵyn sý basqan. S. Rahymov aýyldyq okrýginiń turyndaryn evakýatsiialaýǵa tótenshe jaǵdai qyzmetkerleri jumyldyrylyp, Kókibel aýylynan 133 adam evakýatsiialanǵan. Aýyl turǵyndary týystarynyń úilerine jaiǵastyrylǵan. Qazirgi tańda sý basqan aimaqtardaǵy aryqtardy tazalaý jumystardy júrgizilýde.
«Báidibek aýdanyndaǵy Aqbastaý aýyldyq okrýgine qarasty Turaqty kanalynan tasyǵan sý 3 eldi mekendegi 13 úidiń aýlasyn basyp qaldy. Sý deńgeii 20 sm-ge deiin kóterilgen. Tótenshe jadai qyzmetkerleriniń kómegimen Turaqty aýylynan 55 adam Aqbastaý aýylyndaǵy Sh.Ýálihanov orta mektebindegi evakýatsiialyq pýnktke ornalastyryldy. Onyń ishinde 18-i jas balalar. Oblystyq TJD janynan jergilikti atqarýshy organdar men politsiia qyzmetkerlerinen quralǵan jedel shtab quryldy. Sý tasqyny zardabyn joiýǵa 612 maman men 84 tehnika 47 motopompa tartyldy», - dedi Sáken Qalqamanov.
