© Sputnik / Timýr Batyrshin
Túrkistan oblysynda kóshedegi dárethanalar talan-tarajǵa salynyp, paidalanýǵa jaramai qaldy. Jergilikti turǵyndar olar adam barmaityn ien dalaǵa ornatylǵandyqtan, qandai jaǵdaida ekenin eshkim baqylamaitynyn aitady, dep jazady Sputnik agenttigi.
"Dárethanalardy ornatty, biraq oǵan barý múmkin emes. Byltyr qaita esikteri bar edi, qazir ol da joq. Eshkim qandai jaǵdaida turǵanyn baqylamaidy, bilikke de, adamdarǵa da kerek emes. Muny salyq tóleýshilerdiń qarajatyna ornatty ǵoi. Biz jolda toqtap, dárethanaǵa baramyz. Ishine kirý múmkin emes", - deidi kólik júrgizýshisi Álibek Quralov.
Tonaýshylar dárethananyń esigin, santehnika men qubyrlardy syndyryp, urlap ketken. Soǵan bailanysty jergilikti turǵyndar bilik aqshany dalaǵa shashty dep sanaidy.
Al sheneýnikter kóshe boiyndaǵy dárethanalar eń aldymen azamattarǵa jaily bolý úshin ornatylǵanyn aitty. Sol sebepti olar adam kóp júrmeitin jerlerge ornatylǵan, dep habarlady KTK telearnasy.
Jol boiyna dárethana ornatylǵan soń olarǵa aýyl ákimdigi baqylaý júrgizedi dep josparlanǵan. Alaida bul jospar júzege aspady, onyń sebebi de belgisiz.
Sheneýnikter buǵan naqty qansha qarajat jumsalǵanyn da aita almady. Endi olar dárethananyń saqtalýyna jaýap berýi qajet adamdardy tabýǵa ýáde berdi.
"Qaraýsyz qalǵan dárethanalar boiynsha aýyl ákimdikterine hat joldandy, qazir olardy "Qazavtojol" balansyna berý boiynsha jumys isteýdemiz. Qujattar daiyndalyp jatyr", - dedi Keles aýdany Turǵyn úi-kommýnaldyq sharýashylyq bóliminiń bastyǵy Baqytjan Shyrynbek.
