Túrkistan oblysynyń Shornaq aýylynda jihaz tsehy janyp ketti. Qatty jeldiń saldarynan órtti sóndirý qiyndyq týǵyzdy, dep habarlaidy "Ult aqparat".
Oblystyq Tótenshe jaǵdailar departamentiniń málimetinshe, 16 maýsym kúni saǵat 14.40-ta Túrkistan qalasyndaǵy №1 mamandandyrylǵan órt sóndirý bólimine Qosmezgil kentinde ornalasqan «TAK mebel» jihaz tsehy janyp jatqany týraly habarlama túsken.
Órtti sóndirýge Tótenshe jaǵdailar departamentinen 87 maman men 21 tehnika, Túrkistan oblysynyń Politsiia departamentinen 80 qyzmetker men 12 tehnika, «Apattar meditsinasy ortalyǵynyń» 3 qyzmetkeri men 1 tehnikasy jumyldyrylǵan. Oqiǵa ornyna jedel jetken birinshi bólimshe barlaý jumystaryn júrgizip, tilsiz jaýdy aýyzdyqtaǵan.
«Jalyn 2520 sharshy metr aýmaqty sharpydy. Órttiń taralýy 16 saǵat 53 minýtta toqtatylyp, 21 saǵat 08 minýtta tolyǵymen sóndirildi. Qazirgi tańda oqiǵa sebebi men shyǵyny anyqtalýda», - delingen habarlamada.
Qaza bolǵandar men zardap shekkender joq.
