Túrkistan oblysy boiynsha «Jaily mektep» ulttyq jobasyna Túrkistan oblysynan 63 mektep engizilip, bekitildi. Bul jóninde oblys ákiminiń mindetin atqarýshy Darhan Satybaldynyń tóraǵalyǵymen ótken apparat otyrysynda aityldy.
Óńir basshysynyń mindetin atqarýshy aimaqtaǵy mektep tapshylyǵyn joiý, apatty jáne úsh aýysymdy mektepter máselesin túbegeili sheshý baǵytyndaǵy jumystardy júieleýdi ári shiratýdy tapsyrdy.
«Biýdjetke engizilip, jobalyq-smetalyq qujaty ázirlengen árbir nysan ýaqtyly ári sapaly salynýy tiis. Jaýapty basqarma basshylaryna óńirdegi qurylysy júrip jatqan áleýmettik nysandardy zerdelep, qadaǵalaýdy tapsyramyn. Ásirese búgin talqylanyp otyrǵan bilim uialarynyń qurylysyn qatań qadaǵalaý kerek. Bul rette aýdan, qala ákimderi óz aimaqtaryńyzdaǵy nysandardyń qurylysyn tiisti basqarmalarmen birge kúndelikti baqylaýda ustańyzdar. Ekinshiden, sáýletke jaýapty basqarma óńirdegi mektep ǵimarattaryn salýda bir úlgini usynsyn. Qyrýar qarjyǵa salynǵan keibir nysandardyń sáýleti talapqa sai emes. Úshinshiden, tapsyrysty alyp, jumysty bastamaǵan nemese sapasyz atqarǵan merdigerler tizimi ázirlenip, josyqsyz merdigerler qataryna engizilýi tiis. «Jaily mektep» jobasy boiynsha da jer telimderi men qujattaryn jedel ázirleý qajet. Jumysty shiratyńyzdar», – dedi Darhan Satybaldy.
Túrkistan oblysynyń adami áleýetti damytý basqarmasynyń basshysy D.Bolathanuly men Oblystyq qurylys basqarmasynyń basshysy T.Úsipálievtiń mektepter qurylysy boiynsha baiandamalary men esepteri tyńdaldy.
Qazaqstan Respýblikasynyń Prezidenti Qasym-Jomart Toqaevtyń tapsyrmasyn oryndaý maqsatynda «Jaily mektep» ulttyq pilottyq jobasyn iske asyrý sheńberinde 2023-2025 jyldary Túrkistan oblysynda 63 mekteptiń (jobalyq qýattylyǵy – 57300 oryn) qurylysyn salý josparlanǵan. Onyń ishinde: 300 oryndyq 11 mektep, 600 oryndyq 16 mektep, 900 oryndyq 17 mektep, 1200 oryndyq 8 mektep, 1500 oryndyq 5 mektep, 2000 oryndyq 6 mektep salynbaq. Qazirgi tańda 55 mektep salynatyn jer ýchaskisine menshik quqyǵyn beretin memlekettik aktisi alynǵan, qalǵan jer telimderi boiynsha jumys júrip jatyr. 2024 jyly jalpy 29 mekteptiń, 2025 jyly 34 mekteptiń qurylysyn aiaqtaý mejelengen. Bilim nysandarynyń qurylysy «Samruk-Kazyna Construction» AQ biryńǵai operatory arqyly júzege asyrylady. D.Amangeldiuly atalǵan nysandarǵa qajetti jerdi, infraqurylymdy, gaz, elektr, sý máselelerin jedel sheship, qurylysqa aiyndyqty bastaý jóninde tapsyrma berdi.
Jiynda óńirdegi qurylysy júrip jatqan mektepter máselesi de qaraldy. Sonymen birge jumystary kesheýildep jatqan nysandardyń jai-kúii saraptaldy. 2022 jyly Túrkistan oblysynda 54 mekteptiń qurylys jumystaryn júrgizýge 20,3 mlrd. teńge qarjy qaralǵan. Jyl sońyna deiin 22 mektepti (5100 oryn) paidalanýǵa tapsyrý josparlanǵan. Búgingi tańda 8 mektep (Maqtaaral, Saryaǵash-2, Keles, Tólebi-2, Túlkibas-1, Báidibek aýdandarynda) el igiligine berildi. Qalǵandary jyl sońyna deiin tapsyrylady dep kózdelip otyr.
Apparat otyrysynda oblys biýdjetiniń oryndalý barysy da talqyǵa salyndy. Oblystyq qarjy jáne memlekettik aktivter basqarmasynyń basshysy A.Tasybaevtyń aitýynsha, oblys boiynsha 2022 jyldyń 25 qarashasyndaǵy derekke sáikes, jergilikti biýdjetke túsetin salyqtar men basqa da túsimderdiń jospary 92,6%-ǵa oryndalyp otyr. Tiisti jumys atqarylsa, barlyq aýdan, qalalarda kirister jospary tolyq oryndalady dep kútilýde.
Qarjyny igerý barysyndaǵy máseleler de aityldy. Darhan Satybaldy aýdan, qala ákimderi men basqarma basshylaryna qarjyny igerý, sol arqyly óńir infraqurylymyn jaqsartý boiynsha jumysty jandandyrýdy tapsyrdy.
