Túrkistan oblysynda «Brakoner» jedel-profilaktikalyq is-sharasy ótkizilip, zańsyz balyq aýlaýshylardyń joly kesildi. Atalǵan shara barysynda Sozaq APB-niń politseileri men orman sharýashylyǵy, «Ohotzooprom» qyzmetkerleri birlesken reid jumystaryn júrgizdi, dep habarlaidy QazAqparat tilshisi.
Oblystyq PD baspasóz qyzmetiniń málimetinshe, tártip saqshylary Qarataý-Taiqońyr tehnologiialyq tas joly boiynda kúdik týǵyzǵan kólikti toqtatqan. Tekserý kezinde ishinen 400 keli zańsyz aýlanǵan túrli balyqtar men balyq aýlaýǵa arnalǵan qurylǵylar tabylǵan. Tergeý barysynda kúdiktilerdiń úsheýi de jergilikti turǵyndar bolyp shyqty. Olar óz kinálaryn tolyq moiyndady.
«Qazirgi ýaqytta atalǵan jait boiynsha QR QK-niń 335-baby «Balyq resýrstaryn, basqa da sý janýarlaryn nemese ósimdikterdi zańsyz aýlaý» babymen is qozǵalyp, sotqa deiingi tergeý amaldary júrgizilýde. Al, zańsyz aýlanǵan balyqtar Sholaqqorǵan aýylyndaǵy 3 bóbekjai-balabaqshaǵa úlestirilip berildi», delingen habarlamada.
Politseiler «Brakoner» jedel-profilaktikalyq is-sharasy Túrkistan oblysynyń aýmaǵynda 5 aqpanǵa deiin jalǵasatynyn eskertedi.
