Foto: skrinshot
Shardara aýdanynda qart turǵynnyń soqqyǵa jyǵylýy men qaiǵyly qazasyna bailanysty qylmystyq is tergelip jatyr, dep habarlaidy Ult.kz.
Oblystyq densaýlyq saqtaý basqarmasynyń málimetinshe, Qosseiit aýylynyń turǵyny – Esirkep Sádibekuly Sadaqbaev 2 qyrkúiekten 3 qyrkúiekke qaraǵan túni qaitys bolǵan. Marqum tiri kezinde dárigerlerdiń baqylaýynda bolǵan, oǵan «júrektiń gipertoniialyq aýrýy» jáne «omyrtqa osteohondrozy» diagnozdary qoiylǵan. Degenmen, ol dene jaraqatyna bailanysty dárigerlerge shaǵymdanbaǵan.
«Týystary der kezinde qaitys bolý faktisin habarlamaǵandyqtan, meditsinalyq qyzmetkerler ólimdi tirkeý týraly anyqtama bere almady. Qazir máiitke eksgýmatsiia jasalyp, saraptama taǵaiyndaldy. Qorytyndysy qosymsha jariialanady», – delingen basqarma habarlamasynda.
Buǵan deiin marqumnyń ulyna qatysty QR QK «Adam ólimine ákep soqqan densaýlyqqa qasaqana aýyr ziian keltirý» baby boiynsha qylmystyq is qozǵalǵany habarlanǵan. Ol ýaqytsha ustaý izoliatoryna qamaldy. Al onyń jubaiyna qatysty «Adamdar toby bolyp jasalǵan uryp-soǵý» baby boiynsha sotqa deiingi tergeý júrgizilýde.
Oqiǵa qoǵamda úlken rezonans týdyrdy. Sebebi kórshileri túsirgen beinejazba áleýmettik jelilerde jariialanyp ketken. Kadrdan er adamnyń ákesin uryp jatqanyn, al janynda turǵan áieldiń áreketke tosqaýyl jasamaǵanyn kórýge bolady. Keiin belgili bolǵandai, qart kisi kóz jumǵan.
