Túrkistan oblysynyń politseileri tótenshe jaǵdai kezinde kúsheitilgen rejimde qyzmet atqaryp, tártipke baǵynbai ári zańǵa qaishy óreskel áreket jasaýshylarǵa shara qoldanýda. Oblys boiynsha tótenshe jaǵdai rejimin buzý boiynsha 123 jait anyqtalyp, 43 turǵyn qamaýǵa alyndy, dep habarlaidy "Ult aqparat".
Oblystyq PD baspasóz qyzmetiniń málimetinshe, sottyń sheshimimen 63 turǵynǵa ákimshilik aiyppul salynǵan. Taǵy bir azamatqa eskertý berilip, 16 turǵynnyń isi sotta qaralýda.
«Bul quqyqbuzýshylyq jasaǵan azamattardyń biri tótenshe jaǵdaiǵa qaramastan toi, týǵan kún, betashar, tusaýkeser jasaǵan. Ózgeleri oiyn-saýyq oryndaryn ashyp, adamdardy qabyldaǵany úshin jaýapqa tartyldy. Al, taǵy bireýleri shektelgen ýaqytta adamdar toby bolyp shoǵyrlanǵany úshin eskertý alyp jatyr. Sondai-aq, blokposttarda qyzmette turǵan politseige qarsylyq bildirip, qamaýǵa túsken turǵyn da bar» delingen habarlamada.
Óńirdegi tártip saqshylarynyń qarqyndy jumys atqarýy nátijesinde qylmystar sany 18,2 %-ǵa azaiǵan. Qoǵamdyq orynda jasalǵan quqyqbuzýshylyqtar 25,7 paiyzǵa, kóshelerde jasalatyn qylmystar 26,2 paiyzǵa tómendegen.
