تٷركٸستان وبلىسىنىڭ پوليتسەيلەرٸ تٶتەنشە جاعداي كەزٸندە كٷشەيتٸلگەن رەجيمدە قىزمەت اتقارىپ, تەرتٸپكە باعىنباي ەرٸ زاڭعا قايشى ٶرەسكەل ەرەكەت جاساۋشىلارعا شارا قولدانۋدا. وبلىس بويىنشا تٶتەنشە جاعداي رەجيمٸن بۇزۋ بويىنشا 123 جايت انىقتالىپ, 43 تۇرعىن قاماۋعا الىندى, دەپ حابارلايدى "ۇلت اقپارات".
وبلىستىق پد باسپاسٶز قىزمەتٸنٸڭ مەلٸمەتٸنشە, سوتتىڭ شەشٸمٸمەن 63 تۇرعىنعا ەكٸمشٸلٸك ايىپپۇل سالىنعان. تاعى بٸر ازاماتقا ەسكەرتۋ بەرٸلٸپ, 16 تۇرعىننىڭ ٸسٸ سوتتا قارالۋدا.
«بۇل قۇقىقبۇزۋشىلىق جاساعان ازاماتتاردىڭ بٸرٸ تٶتەنشە جاعدايعا قاراماستان توي, تۋعان كٷن, بەتاشار, تۇساۋكەسەر جاساعان. ٶزگەلەرٸ ويىن-ساۋىق ورىندارىن اشىپ, ادامداردى قابىلداعانى ٷشٸن جاۋاپقا تارتىلدى. ال, تاعى بٸرەۋلەرٸ شەكتەلگەن ۋاقىتتا ادامدار توبى بولىپ شوعىرلانعانى ٷشٸن ەسكەرتۋ الىپ جاتىر. سونداي-اق, بلوكپوستتاردا قىزمەتتە تۇرعان پوليتسەيگە قارسىلىق بٸلدٸرٸپ, قاماۋعا تٷسكەن تۇرعىن دا بار» دەلٸنگەن حابارلامادا.
ٶڭٸردەگٸ تەرتٸپ ساقشىلارىنىڭ قارقىندى جۇمىس اتقارۋى نەتيجەسٸندە قىلمىستار سانى 18,2 %-عا ازايعان. قوعامدىق ورىندا جاسالعان قۇقىقبۇزۋشىلىقتار 25,7 پايىزعا, كٶشەلەردە جاسالاتىن قىلمىستار 26,2 پايىزعا تٶمەندەگەن.
