Túrkistan oblysynda 3,3 mln tonna aýyl sharýashylyǵy ónimi jinalyp, rekordtyq kórsetkishke qol jetkizildi. Bul týraly óńir ákimi Ómirzaq Shókeev aityp berdi, dep habarlaidy QazAqparat.
«Biyl 805,3 mlrd teńgege aýyl sharýashylyǵy ónimi óndirildi, aýyl sharýashylyǵy daqyldary 842,4 myń gektar jerge egildi. Egistikti ártaraptandyrý júrip jatyr, iaǵni sýdy kóp tutynatyn maqta, kúrish siiaqty daqyldar qysqaryp, kókónis, baqsha, kartop ónimderi kóbeidi. Olardyń túsimdiligi ortasha 20 tsentnerge ósip, ótken jyldan 500 myń tonnaǵa artty. Jalpy óńirde 3,3 mln tonna ónim jinalyp, rekordtyq kórsetkish boldy», - dedi Ó. Shókeev Ortalyq kommýnikatsiialar qyzmetinde ótken baspasóz máslihatynda.
Ákimniń aitýynsha, óńirdegi jylyjailar da keńeiip jatyr, onyń jalpy kólemi 1 440 gektarǵa jetedi. Bul respýblikanyń 71 %-yn quraidy.
«Bir alqaptan jylyna 2-3 ónim alý» jobasy aiasynda 8,9 myń ga 2 878 joba iske asyp, 280 myń tonna kókónis ónimi jinaldy. Respýblikada sýarmaly jerlerdiń úshten biri oblysqa tiesili. Aǵyn sýdy tiimdi paidalaný maqsatynda ylǵal únemdeý tehnologiialaryn engizý jolǵa qoiyldy. Búgingi tańda oblysta 4 myń gektarǵa jańbyrlatyp sýarý jáne 25,5 myń gektarǵa tamshylatyp sýǵarý tehnologiialary engizildi. Budan bólek, sońǵy 2 jylda 172 shaqyrym 23 kanalǵa jóndeý jáne 241 shaqyrym 121 qashyrtqyǵa mehanikalyq tazalaý jumystary júrgizildi. Nátijesinde 92 myń ga sýarmaly jerdiń meliorativtik jaǵdaiy jaqsardy», - deidi Ó. Shókeev.
«Mal sharýashylyǵynda mal basy men ónimdilik 5%-ǵa artyp, 291,4 mlrd teńgege ónim óndirildi. Et eksporty boiynsha oblys respýblikada 1-orynda tur. Biyl aýa-raiynyń qýańshylyǵyna bailanysty bolǵan mal azyǵy tapshylyǵyn joiý maqsatynda aýqymdy jumystar atqaryldy. Sonyń nátijesinde mal azyǵyn daiyndaý jospary 108%-ǵa oryndalyp, 4 mln tonnadan astam azyq jinaldy», - deidi óńir basshysy.
