Foto: Polisia.kz
Túrkistan oblysynda aýa raiynyń qolaisyzdyǵyna bailanysty politsiia kúsheitilgen tártippen qyzmet etip jatyr, – dep habarlaidy "Ult aqparat" Polisia.kz media-portalyna silteme jasap.
"Túrkistan oblysy aýmaǵyndaǵy qolaisyz aýa raiyna bailanysty jol jabylyp, politsiianyń kúsheitilgen tártippen qyzmet etip jatqanyna búgin ekinshi kún.
Jol apattaryn boldyrmaý men turǵyndardyń qaýipsizdigin qamtamasyz etý maqsatynda politsiia qyzmetkerleri táýlik boiy respýblikalyq, oblystyq mańyzy bar joldarǵa jumyldyryldy. Máselen, 1 aqpanda Sozaq aýdanyndaǵy oblystyq mańyzy bar Sholaqqorǵan – Ashysai – Kentaý joly men Jambyl oblysymen shekaralas aýmaqtaǵy halyqaralyq Almaty – Tashkent – Termez jolynyń 534-593 shaqyrymy qar men borannyń saldarynan kórý múmkinshiligi joq bolýyna sáikes jabyldy" - delingen habarlamada.
Portal málimetinshe, barlyq transport qozǵalysyna shekteý qoiylyp, jolaýshylar jyly jáne qaýipsiz oryndarǵa jetkizilip jatyr.
"Barsha azamattardan jolǵa shyqpaýlaryn suraimyz! Uzaq jolǵa shyǵý asa qajet bolyp jatsa, kólikti daiyndap, kóp mólsherde janar-jaǵarmaimen qamdap, qosymsha syrtqy jyly kiimder men azyq-túlik alýdy usynamyz. Sondai-aq mindetti túrde jol qozǵalysy erejelerin saqtap, jyldamdyqty asyrmaýǵa shaqyramyz", – deidi politseiler.
