Túrkistan oblystyq №1 perzenthananyń bas dárigeri men esepshisi para alý jáne memleket múlkin jymqyrý baby boiynsha sottaldy, dep habarlaidy "Ult aqparat" Stan.kz aqparattyq agenttigine silteme jasap.
Sot aldyna bas dáriger men esepshiden bólek, para berý jáne bótenniń múlkin jymqyrdy dep aiyptalǵan eki kásipker de jaýap berdi.
"Quny shamamen 13 million teńge turatyn jylý qazandyǵy memlekettik satyp alý týraly shartta 15 millionǵa baǵalanǵan. Is boiynsha deldal JShS basshysy bolyp shyqty. Memleket qarjysynyń aýdarylýy boiynsha tergeý bastalyp, qylmystyq is qaraldy", – dedi Shymkent qalalyq qylmystyq ister jónindegi aýdanaralyq sotynyń tóraǵasy Ainel Oraqbaeva.
Sottalýshylardyń kinási tolyq dáleldendi. Is boiynsha tórt aiyptalýshyǵa da aiyppul salyndy. Sottalýshy burynǵy bas dáriger men esepshi memleketke árqaisysy 27 million teńgeden, al kásipkerler 15 jáne 20 million teńgeden tóleýge tiis.
"Barlyǵy óz kinásin tolyq moiyndap, is boiynsha dáleldemelerdi daýlamady jáne jedeldetilgen tergeý túrindegi aryz berdi. Sotta olar jasaǵan áreketine ókinetinin bildirdi. Sondyqtan sot tórteýine de aiyppul saldy", – delingen sot habarlamasynda.
Eske salsaq, buǵan deiin Túrkistan oblysynda jumyspen qamtý ortalyǵynyń qyzmetkerleri 24 million teńgeden astam aqshany jymqyrǵany týraly jazǵan edik.
