Túrkistan oblysynda pandemiia kezinde elge kómektesý maqsatynda «ÓMIR» jáne «ShIPA» atty jobalar qolǵa alyna bastady.
«Nur Otan» partiiasy Túrkistan oblystyq filialynyń uiymdastyrýymen júzege asyrylatyn jańa jobany «Jas Otan» jastar qanaty jáne oblystyq «Jastar resýrstyq ortalyǵy» janynan qurylǵan «Jas Turkistan» eriktiler qozǵalysy úilestiretin bolady, dep habarlaidy "Ult aqparat".
Búgin Túrkistan oblystyq qoǵamdyq densaýlyq basqarmasynyń ǵimaratynda osy jobalardy júzege asyrý resmi túrde bastaldy. Atalǵan basqarmaǵa Túrkiiadan ákelingen eki jasandy tynys alý apparaty usynylsa, 20-dan astam naýqasqa shaldyqqan muqtaj otbasylarǵa dári-dármek tapsyryldy. Apparatty jetkizýge atsalysqan Qazaqstannyń Túrkiiadaǵy elshiligi men elshisi Abzal Saparbekulyna alǵys aityldy.
«ÓMIR» jobasy elimizde tapshy bolyp otyrǵan ottegi apparattaryn shet memleketterden óńirimizdegi emhanalarǵa jetkizý maqsatynda qolǵa alynyp otyr. Al, «ShIPA» jobasy arqyly orta deńgeidegi dári-dármekter qorapshasyn daiyndap, ony aýyl-aýdandardaǵy áleýmettik jaǵdaiy tómen jáne de az qamtylǵan kópbalaly otbasylarǵa otbasylarǵa taratý kózdelgen. Osy jobalardy júzege asyrý úshin el janashyrlary, oblystyq máslihattaǵy «Nur Otan» partiiasynyń fraktsiia ókilderi men ózge de azamattar qoldaý kórsetip otyr.
Qazirdiń ózinde qorǵa 10 million teńgeden astam qarjy jinalǵan. Bul qarjynyń bir bóligine Túrkiia jáne Qytai elderine 50 jasandy tynys alý apparatyna tapsyrys berilip, olar aldaǵy aptada óńirge jetkiziledi. Sonymen birge ázirge 300 dári-dármek qorapshasyn elge taratý kózdelgen. Árbir dári qorapshasynyń quny 14-15 myń teńge kóleminde bolmaq. Qorapsha ishinde Túrkistan oblysy qoǵamdyq densaýlyq basqarmasy tarapynan usynylǵan ári qazir beleń alyp otyrǵan koronavirýs pen pnevmoniia indetiniń aldyn alýǵa, emdelýge arnalǵan dáriler men preparattar bar. Alǵashqy eki jasandy tynys alý apparatyn alýǵa demeýshilik kórsetken «Nur Otan» partiiasynyń Túrkistan oblystyq filialy tóraǵasynyń birinshi orynbasary Beisenbai Tájibaev bul jobalar óńirdegi jas eriktilerdi igi iske jumyldyryp otyrǵanyn jetkizdi.
«Qazir elimizde koronavirýs indeti keń taralyp, el qinalyp jatyr. Naýqastar sany da artyp keledi. Túrkistan oblysynda COVID-19 rastalǵan naýqastar sany 2370-ten asty. Ókinishke qarai, jasandy tynys alý apparattary men dári-dármek jetispeýshiligi de baiqalyp otyr. Sondyqtan da partiia bastamasymen óńirdiń belsendi jastardan quralǵan «Jas Turkistan» eriktiler qozǵalysy qurylyp, osy jobalardy bastap ketti. Bul jumystar oblystyq qoǵamdyq densaýlyq basqarmasymen de birlesip atqarylady. Igi bastamaǵa partiia ókilderi, máslihat depýtattary qoldaý kórsetip jatyr. Pandemiiamen kúreste, muqtaj otbasylarǵa kómektesýde atalǵan jobalar tiimdiligin kórsetedi dep senemin. Osy qiyn kezeńde elge kómektesýge barsha azamattardy atsalysýǵa shaqyramyz», – dedi B.Tájibaev.
Jalpy bul jobaǵa qazir oblystyq máslihat depýtattary – Nuraly Ábish (5 mln. teńge), Almas Salimov (1 mln. teńge), Jańabai Aǵabekov (1 mln. teńge), Maǵaýiia Turysbekov (875 myń teńge), Qainar Abbasov (767 myń teńge), Baimahan Súleimenov (200 myń teńge) aýdardy. Sonymen birge Jazira Ydyrysova (1 mln. 50 myń teńge) men Inara Namazbaeva (400 myń teńge) syndy el janashyrlary da qarjylai qoldaý kórsetip otyr. Óńirdegi volonter jastar sonymen birge aýrýhanalardaǵy naýqastarǵa saýmal men qymyz jáne azyq-túlik jetkizýdi qolǵa aldy.
Túrkistan oblystyq «Jastar resýrstyq ortalyǵynyń» direktory Amalbek Ómirtai men «Jas Otan» jastar qanatynyń Túrkistan oblystyq filialynyń tóraǵasy Janserik Juman jobalardy júzege asyrýǵa aýyl-aimaqtardaǵy jastar da úles qosatynyna senim bildirip, saýapty is tutas oblysty qamtitynyn jetkizdi.
