Túrkistan oblysynda «Rýhani jańǵyrý» baǵdarlamasynyń «Memlekettik tildi latyn qarpine kóshirý» jobasy boiynsha birqatar jumystar atqarylyp jatyr. Búginde osy joba aiasynda oblysta jalpy 1138 is-shara ótkizildi, dep habarlaidy "Ult aqparat" oblys ákimidiginiń baspasóz qyzmetine silteme jasap.
El Prezidentiniń latyn álipbiine kóshý jónindegi bastamasy óńir halqy arasynda keńinen qoldaý tapty. Osy baǵytta Túrkistan oblysynda shet elderden kelgen jazýshylar, oblystyń ziialy qaýym ókilderi, túrkitanýshy ǵalymdardyń qatysýymen birqatar seminarlar men ǵylymi-praktikalyq konferentsiialar uiymdastyryldy.
Sonymen qatar, aǵymdaǵy jyldyń 19 maýsymynda oblystaǵy 428 kitaphanada latyn álipbiinen «Ulttyq mura» taqyrybynda diktant jazý aktsiiasy ótti. Kitaphanalardaǵy bul diktantqa myńdaǵan adam qatysty. Túrkistan oblysynyń ákimi Janseiit Túimebaev Ońtústik Qazaqstan memlekettik pedagogikalyq ýniversitetinde stýdenttermen kezdesip, «Rýhani jańǵyrý: jastarǵa jańa baǵdar» taqyrybynda lektsiia oqydy.
Latyn álipbiiniń mán-mańyzyna toqtalǵan óńir basshysy ult sanasyn serpiltýde jańa álipbidiń paidasy mol ekenin jetkizip, bul másele nazarynda bolatynyn sóz etti. «Rýhani jańǵyrý» baǵdarlamasy boiynsha óńirlik jobalyq keńseniń málimetinshe, aldaǵy ýaqytta da latyn qarpin nasihattaý, qoldanysqa engizý jolyndaǵy jumystar jalǵasa bermek. Óitkeni, bul bastamaǵa qyzyǵýshylyq joǵary.
Sonymen birge, Túrkistan oblysynda «Jańa gýmanitarlyq bilim: 100 jańa oqýlyq» arnaiy jobasy boiynsha da tiisti jumystar qolǵa alynǵan. Óńirde memlekettik tilge aýdarylǵan 18 oqýlyqtyń tanystyrylymy ótti. Oǵan joǵary oqý orny basshylary men ziialy qaýym ókilderi, stýdentter qatysqan. Stýdentterge baǵdarlamanyń negizgi basymdyqtary túsindirilip, «100 jańa oqýlyq» jobasy sheńberinde qazaq tiline aýdarylǵan oqýlyqtardy tanystyrý, latyn álipbiine kóshý jáne «Tsifrlyq Qazaqstan» baǵdarlamasyn júzege asyrý maqsatynda onkúndik ótti. Ýniversitette «Rýhani jańǵyrý» alańy, «Qazaq tilindegi 100 jańa oqýlyq kovorking ortalyǵy» jáne oqýshylarǵa arnalǵan aqysyz kompiýter synyptary ashyldy.
Búginde Túrkistan oblysyndaǵy 2 joǵary oqý ornynda Jobalyq keńseler qurylyp, «Rýhani jańǵyrý» baǵytynda túrli alańshalar istep tur. Ýniversitet kitaphanalarynda «100 jańa oqýlyq» jobasy boiynsha arnaiy buryshtar jasaqtalǵan. Syrdariia ýniversitetinde «100 jańa oqýlyq» jobasy aiasynda jaryq kórgen oqýlyqtar skanerlenip, ýniversitettiń saityna salyndy. Qazirgi tańda qundy kitaptar stýdentterdiń rýhani igiligine jarap tur.
