Túrkistan oblysynda 70 mln teńgeniń malyn urlaǵan qylmystyq top músheleri ustaldy. Bul týraly oblystyq Politsiia departamentiniń basshysy Qairat Dálbekov brifing barysynda málim etti, dep habarlaidy "Ult aqparat".
Politsiia general-maiory Qairat Dálbekovtiń aitýynsha, barymtashylar toby Túrkistan jáne Kentaý qalalarynyń aýmaǵynda tórt túlikti qoldy etip kelgen. Olar úsh jyldyń ishinde 150-den astam jylqy men siyr urlaǵan. Kúdiktiler kentaýlyq turǵynnyń politsiiaǵa aryzynan keiin izdestirile bastaǵan.
«Kentaýlyq turǵyn 20-dan astam jylqysy joǵalyp ketkenin aitty. Oqiǵa ornyna shyqqan Kriminaldyq politsiia qyzetkerleri, iaǵni jedel ýákilder jaqyn mańdaǵy barlyq aýmaqtar men jaiylymdardy aralap, kórgen adamdar men aýyl turǵyndarynan surastyrǵan. Mal tasymaldaityn avtokólikterdi jáne mal satyp alatyn oryndardy muqiiat tekserip shyqty. Jedel-izdestirý is-sharasy barysynda osy qylmysqa qatysy bar degen Túrkistan men Kentaý qalasynyń 5 kúdikti turǵynyn, onyń ishinde urlanǵan maldardy satyp alýshyny da ustady. Tergeý barysynda barymtashylardyń 125 jylqy men 30 bas iri qara maldyń urlyǵyna qatysy bar ekendigi anyqtaldy. Búgingi tańda 2017-2020 jyldar aralyǵynda mal urlyǵynyń 19 jaityna qatysy bary belgili boldy», - dedi Qairat Dálbekov.
Politsiia departamenti bastyǵynyń sózinshe, qylmystyq toptyń quramyndaǵylardyń árqaisysy ózine júktelgen mindetti oryndaǵan. Biri maldy jaiylymnan urlap tursa, basqalary qora-jailarǵa jasyrýmen ainalysqan. Taǵy biri urlanǵan maldy satqan nemese satý úshin soiyp otyrǵan.
Kúdiktilerdiń úiin tintý kezinde tártip saqshylary 18 bas jylqy men 9 siyrdy tárkilep, olardy zańdy ielerine qaitarǵan.
«Qazirgi ýaqytta atalǵan jait boiynsha sotqa deiingi tergeý amaldary júrgizilýde. Jábirlenýshilerge keltirilgen shyǵynnyń jalpy kólemi 70 millionnan astam teńgeni qurady. Kúdiktiler qamaýǵa alyndy. Politsiia qyzmetkerleri ustalǵandardyń basqa da osyǵan uqsas mal urlyǵy derekterine qatystylyǵyn anyqtaýda», - dedi Qairat Dálbekov.
